Kezekten tys Prezıdent saılaýy – jańa ári ádil Qazaqstandy qurý jolyndaǵy demokratııalyq úderistiń bastamasy. Sondyqtan saıası naýqandy barynsha ashyq jáne belgilengen talaptarǵa sáıkes ótýin qadaǵalaý asa mańyzdy. Bul týraly «Ádil saılaý úshin» qoǵamdyq shtabynyń ókilderi baıandady.
Atalǵan shtabtyń ókili, zań ǵylymdarynyń doktory Maıgúl Mataevanyń aıtýynsha, qoǵamdyq uıymnyń basty mıssııasy – aldaǵy saıası naýqannyń konstıtýsııalyq normalarǵa saı ótýin qadaǵalap, elektorattyń óz tańdaý quqyǵynyń buzylýyna jol bermeý.
«Jastar men qoǵamǵa túsindirý jumystarynan bólek, osy shtab saılaý týraly zańnamadaǵy ózgerister jóninde, sondaı-aq bıylǵy konstıtýsııalyq reforma jóninde aqparattarmen bólisýdi kózdeıdi.
Baıqaýshylardyń qyzmeti týraly kópshilik bile bermeıdi. Aldaǵy saıası naýqanda shtab tarapynan baıqaýshylar bolady. Olardyń basym bóligi – zańgerler men ǵalymdar. Baqylaý barysy ádil túrde ótedi degen senimdemiz. Belgilengen talapqa sáıkes ár ýchaskede qandaı da uıymnyń atynan bir-bir baıqaýshydan bolýǵa tıis», dedi M.Mataeva.
Qazaqstan zańgerler odaǵynyń ókili Ermek Ábdirasulov aıtqandaı, «Ádil saılaý úshin» shtaby qandaı da bir memlekettik uıymnyń múddesin qorǵamaıdy. Qoǵamdyq uıym saıası aǵartýshylyqqa basymdyq berip, belsendi azamattyq qoǵam qurýǵa yntaly.
«Azamattyq qoǵamdastyqtyń ókilderi retinde bizdi saılaý týraly zańnamany keńinen nasıhattaý qyzyqtyrady. Nege deseńiz, buqaralyq aqparat quraldary men qoǵam tarapynan bul baǵytta suraq kóp qoıylady. Osy ýaqytqa deıin birneshe respýblıkalyq telearnanyń baǵdarlamalaryna qatysyp, merzimdi basylymdarǵa suhbat berdik. Onda ádil saılaýdy ótkizýdiń qanshalyqty mańyzdy ekendigi jaıly ustanymymyzdy bildirdik.
Biz úshin eń mańyzdysy, saılaýdyń zańǵa saı ashyq ári ádil ótýi. Álbette, elimiz úshin mańyzdy saıası oqıǵa týraly halyqtyń tarapynan qoıylyp jatqan suraq óte kóp. Onyń ishinde prezıdentikke túsetin úmitkerlerge qoıylatyn talaptar jóninde, sol sekildi jańadan belgilengen 7 jyldyq merzimge baılanysty másele az emes. Jas ereksheligi men barlyǵyna qarsy daýys berý týraly surap jatqandar jeterlik. Sondaı-aq elimizdegi saılaý prosesiniń halyqaralyq talaptarǵa qanshalyqty saı ekendigi jóninde bilgisi keletinder bar. Akkredıtteýden ótken halyqaralyq jáne jergilikti baıqaýshylardyń aıyrmashylyǵyn áli de keńirek durys jetkizý qajet. Budan bólek, saılaýda zań buzýshylyqtar oryn alsa, kim jáne qalaı jaýap beretini týraly suraqtar kóp», dedi E.Ábdirasulov.
Zań ǵylymdarynyń doktory, professor Indıra Áýbákirovanyń pikirine súıensek, qazir Qazaqstan zamanaýı jylnamasynda jaýapty sátte tur. Osy saılaýdyń nátıjesinde kópshilik kútip otyrǵan jańa ári ádil memleket qurý tujyrymdamasy qanshalyqty ári qalaı júzege asatyny belgili bolady.
«Qasıetti Abaı óńirinen elimizdiń qanshama rýhanı tulǵalary shyqqany barlyǵyna málim. Osy rette uly Abaıdyń ózi bolystyqqa saılaý arqyly kelgenin aıta ketken oryndy. Al ult kósemi Álıhan Bókeıhan halyqtyń tańdaýy arqasynda Memlekettik dýmaǵa depýtat bolyp túskenin umytpaýymyz qajet.
Qazir elimiz jańa kezeńniń aldynda tur. Dál osy sátten bastap Qazaqstannyń damýdyń dańǵyl jolyna túsýiniń esebi bastalmaq. Árıne bul jolda ádildik saltanat quryp, demokratııalyq prosester qarqyn alsa eken degen tilegimiz bar. Bul saılaý basqa saılaýlardan ózgeshe bolatynyna senimimiz joǵary.
Taıaýda Memleket basshysy Qazaqstan demokratııalyq el ekenin aıta kele memleketti basqaratyn Prezıdent te halyqtyń tańdaýyna sáıkes saılanatynyn jetkizgen bolatyn. Prezıdent aldaǵy saılaýdyń ashyq ári ádil ótetinine ýáde etti. Bul – Memleket basshysynyń berik ustanymy», dedi I.Áýbákirova.
Shtab ókilderi bıylǵy saıası doda elimizdegi saılaý sıkline oń áser etetinine senimdi. Demek bul saıası jańǵyrýdyń tek bastamasy ǵana deıdi uıym músheleri.
Abaı oblysy