Kásipqoı rıngtegi óziniń úshinshi jekpe-jegin Abylaıhan Júsipov 5 qarashada AQSh-tyń Mınneapolıs qalasynda ótkizedi.
Qaraǵandy oblysynyń Abaı qalasynda týyp-ósken 25 jastaǵy bylǵary qolǵap sheberi buǵan deıin áýesqoılar rınginde jasyndaı jarqyldaǵan edi. 69 kılo salmaq dárejesinde baq synaǵan ol 2017-2021 jyldary Gambýrg, Ekaterınbýrg jáne Belgradta ótken úsh birdeı álem chempıonatynda qola medal ıelendi. Tashkentte Azııa birinshiliginiń kúmis júldegeri atandy. Birneshe ret Qazaqstan chempıonatynda top jaryp, túrli halyqaralyq týrnırde jeńis tuǵyryna kóterildi. 2020 jyly kásipqoı rıngte kúsh synasýǵa bel býǵan qandasymyz osy kúnge deıin eki kezdesý ótkizip, ekeýinde de jeńiske jetti.
Al joǵaryda aıtylǵan boks keshiniń basty jekpe-jeginde qazaqtyń uly Aıdos Erbosynuly (16-0, 11 KO) men kýbalyq Davıd Morrel (7-0, 6 KO) judyryqtasady. Bul básekede WBA-nyń ekinshi orta salmaqtaǵy chempıondyq belbeýi sarapqa salynady.