Álemniń eń beldi uıymy UFC-de kúsh synasyp júrgen Qytaıda týyp-ósken qandasymyz Maqsat Qaısar óziniń kelesi jekpe-jegin 17 jeltoqsanda ótkizedi.
23 jastaǵy Maqsat óz kezdesýleriniń denin Qytaı elindegi WLF W.A.R.S. promoýsheninde ótkizdi. Osydan dál bir jyl buryn kanadalyq Ahılles Estremadýrany jeńgen ol UFC-de óner kórsetý quqyǵyna ıe boldy. Bıyl jazda qazaqtyń qaısar uly Sıngapýrde uıymdastyrylǵan jarysta amerıkalyq Stıv Garsııany birinshi raýnda uryp jyǵyp, san mıllıon kórermenniń qoshemetine bólendi. Aralas jekpe-jekten barlyǵy 10 kezdesý ótkizgen Maqsat Qaısar sonyń tek bireýinde ǵana jeńilistiń kermek dámin tatty. Kelesi básekesin ol Rafa Garsııaǵa qarsy ótkizedi. 28 jastaǵy Meksıkanyń týmasy 2014 jyldan beri osy sport túrimen shuǵyldanýda. Sol aralyqta 16 ret oktagonǵa shyqqan Garsııa 13 ret jeńis toıyn toılap, toǵyz kezdesýin merzimnen buryn aıaqtady.