Senat Tóraǵasy Máýlen Áshimbaevtyń qatysýymen «Ulttyq múdde» dıalog alańynyń otyrysy ótti, dep habarlaıdy Egemen.kz.
Respýblıka kúnine oraı uıymdastyrylǵan is-shara «Egemendik jáne Qazaqstannyń saıası-quqyqtyq transformasııasy» taqyrybyna arnaldy. Jıynǵa qatysqan zııaly qaýym ókilderi, sarapshylar elimizde júrgizilip jatqan qoǵamdyq-saıası jáne áleýmettik baǵyttaǵy reformalardy, egemendigimizdi odan ári nyǵaıtý máselelerin talqylady.
Otyrysty ashqan Máýlen Áshimbaev Memleket basshysy Qasym-Jomart Toqaev Ulytaý tórinde ótken Ulttyq quryltaıda Respýblıka kúnin qalpyna keltirip, oǵan ulttyq mereke mártebesin qaıtarýdy usynǵanyn, bul tarıhı sheshim ekenin atap ótti.
Sondaı-aq Senat Tóraǵasy memlekettiligimizdiń qalyptasýy jolynda 1990 jyly 25 qazanda qabyldanǵan Qazaqstannyń memlekettik egemendigi týraly deklarasııa asa mańyzdy ról atqarǵanyn tilge tıek etti. Eldiń Táýelsizdigine jol ashqan bul taǵdyrsheshti qadam egemendiktiń quqyqtyq negizi boldy.
«Táýelsizdik týraly aıtqanda, onyń negizi bolǵan Deklarasııanyń róli men mańyzyna árdaıym basa mán berýimiz kerek. Osy oraıda Respýblıka kúnin ulttyq merekege aınaldyrý tarıhı ádilettiliktiń saltanaty dep sanaımyz. Biz tarıhymyzdaǵy taǵdyrsheshti kúnder men oqıǵalardy umytpaı, ulyqtaýymyz qajet. Sol arqyly biz ótkenge obektıvti kózqaras qalyptastyramyz», dedi Máýlen Áshimbaev.
Sonymen qatar Senat Spıkeri elimiz úshin Táýelsizdik kúniniń róli alasarmaıtynyna, bul datanyń qoǵamdyq-saıası ómirimiz ben tarıhymyzdaǵy mańyzy zor ekenine toqtaldy.
«Jeltoqsan – halqymyz úshin qasıetti ári qasterli aı. Alash úkimeti erkindikke umtylyp, osy aıda avtonomııa jarııalady. Egemendik jolyndaǵy ulttyq rýhtyń sımvolyna aınalǵan 1986 jylǵy Jeltoqsan kóterilisin de el jadynan óshirý múmkin emes. Sondyqtan Táýelsizdik kúninde biz kóbine tarıhqa úńilip, odan taǵylym alýǵa mán beremiz», dedi Senat Tóraǵasy.
О́z sózinde Máýlen Áshimbaev qazirgi álemdik ahýalǵa nazar aýdaryp, búgingideı shıelenisti jaǵdaıda eldigimizdi nyǵaıtý bizdiń eń basty maqsatymyz ekenin aıtty. Sondaı-aq ol Memleket basshysynyń bastamasymen elimizde saıası júıeni jańǵyrtýǵa arnalǵan aýqymdy jumys atqarylyp jatqanyn jáne búginde Qazaqstan damýdyń jańa kezeńine qadam basqanyn atap ótti.
«Bılik tarmaqtarynyń tepe-teńdigi artyp, eseptilik pen ashyqtyqty qamtamasyz etetin mańyzdy ózgerister oryn alýda. Konstıtýsııalyq sot qurylady. Adam quqyǵyn qorǵaý jónindegi ýákildiń mártebesi de buryn bolmaǵan deńgeıge kóterilýde. Bul baǵytta Parlament Senaty jurtshylyqpen turaqty túrde kezdesip, júrgizilip jatqan reformalardy zańnamalyq turǵydan qoldaý máseleleri boıynsha keńesip jumys isteýdi jalǵastyra beredi», dedi Máýlen Áshimbaev.
Otyrysqa senatorlarmen birge memleket jáne qoǵam qaıratkerleri Qýanysh Sultanov, О́mirzaq Ozǵanbaev, Senatorlar keńesi tóraǵasynyń orynbasary Birǵanym Áıtimova, professor Nına Kaıýpova, Qazaqstan strategııalyq zertteýler ınstıtýty dırektorynyń orynbasary Alýa Joldybalına, Parlament Senaty janyndaǵy Jas sarapshylar klýbynyń músheleri jáne basqa da birqatar sarapshy qatysty.