«Birlik» – tájirıbe almasý alańy

Jastar lageriniń ashylý rá­simine «Qoǵamdyq kelisim» RMM dırektorynyń orynbasary Appaz Kemelev, Qostanaı oblysy­nyń «Qoǵamdyq kelisim» KMM dırektory Natalıa Ramazanova jáne «Assambleıa jastary» RQB tóraǵasy Talǵat Jurymbaev qatysty.

– Biz búgin Qostanaı obly­syndaǵy Áýlıekól aýdanynda tabıǵı apattan zardap shekken turǵyndarǵa gýmanıtarlyq kómek kórsetý sharalaryna belsendi atsalysqan eriktilerdiń basyn qosyp otyrmyz. Qazaqstannyń barlyq óńirinen kelgen jas­tar kóshbasshylary, belsendi jas­tardyń kóbi keldi. Jastar – qa­shan da qoǵamnyń qozǵaýshy kúshi. Ushqan qustyń qanaty talatyn ulan-ǵaıyr ota­nymyz­dyń qaı buryshynda júr­se de, el­dik týy kóterilgen sátte jumyla júk kóterip, kópke úlgi kórsete bil­gen jasampaz jasta­rymyzdyń kóp ekenine qýanamyz, – dedi saltanatty jıynda alǵysóz alyp, jastardy quttyqtaǵan Tımýr Jurymbaev.

QHA jastarynyń Al­maty qalalyq ókildigi tór­aǵa­synyń orynbasary Omar Moham­med­sa­rýardyń sózinshe, elimizdiń ár óńi­rinde birin-biri kórmeı ıgi iske jumylyp júrgen volon­ter jastardyń bir jylda bir ret basyn qosatyn «Birlik» lageriniń mańyzy erek, jóni bólek. Jastar mundaı sharalardy asyǵa kútedi. О́ıtkeni bir-birimen tanysyp, júzdesip, bilisip, jastarǵa qa­tys­ty máselelerdiń ári qaraı sheshilý joldaryn aqyldasyp-keńesedi. Pikir alysyp, tájirıbe almasady.

Jyl saıyn eriktiler qozǵa­lysyna atsalysyp júrgen bel­sendi jastardyń arasynda uıym­dastyrylyp turatyn dástúrli is-sharanyń maqsaty – dostyq baı­lanystardy nyǵaıtý, pat­rıotızm, el múddesine jumylý, birlik qaǵıdattaryn sanaǵa sińi­rý. Volonter jas­tar Altynsarın aýdanyndaǵy qa­lyń orman aıasyna ornalasqan «Jaılaý» demalys ornynda birneshe kún qatary­nan medıa saýattylyqty kóterý, aqparattyń aq-qarasyn ajy­rata bilý, áleý­mettik jelilerde etnosaralyq shıelinisterdiń aldyn alý týraly dárister tyńdady. San alýan sporttyq mádenı sharalarǵa qatysyp, kóńildi jarystar ótkizdi. Sondaı-aq qyrkúıektiń basynda órtengen Amanqaraǵaı ormanyna baryp, bir kún boıy qaraǵaı kóshetterin otyrǵyzdy.

Lagerdiń birinshi kúni Qosta­naı oblysy QHA ǵylymı-sarap­shylyq tobynyń múshesi, fılologııa ǵylymdarynyń kandı­daty Dmıtrıı Kacheev jastar­ǵa kúndelikti ómirde jáne áleýmet­tik jelilerde oryn alyp jat­qan etnosaralyq ultaralyq jaǵ­daı­dy ýshyqtyryp, el ishine syna qaǵatyn keleńsiz jaǵdaılar­dyń aldyn alý jóninde trenıng ótkizdi.

Sondaı-aq Memlekettik qyzmet isteri agenttiginiń Qostanaı obly­syn­daǵy departamentiniń basshysy Ashat Eskendirov jastarǵa memlekettik qyzmetshiniń usta­ny­my, patrıottyq tárbıe, bilim alý­dyń mańyzy jóninde áńgimeledi.

 Memleket basshysy Qasym-Jomart Toqaevtyń «Qazaqsha sóıleıtin jastar kóbeıip kele jatyr. Jalpy, tildik orta túbegeıli ózgerdi. Qazaq tilin biletin ózge ult ókilderi de az emes» degen sóziniń dálelin osy halyqaralyq jastar lagerinen kórdik. Munda ótken qyzyqty da, mazmundy sharanyń biri Katerına Gedzýrdyń búgingi qoǵamdaǵy qazaq tiliniń orny men qyzmeti týraly máselege arnalǵan trenıngi boldy.

– Qazirgi jastar memlekettik tildiń mańyzyn aıqyn túsinedi, qadir-qasıetin shynaıy sezi­nedi. Til – ult pen ultty jaqyn­dastyratyn eń úlken qatynas qu­raly. Meniń oıymsha, qazaq tilin úırenetinder til bilýdiń bar­lyq artyqshylyǵyn túsi­nýi kerek. Biz qazaq tilin meń­gerý arqyly óz ómirimizdi je­ńil­detemiz, kóptegen renish, ókpe-naz týdyratyn keleńsiz jaǵdaı­lar­dan aýlaqtaımyz. Qazaq tilin meńgergen jastardyń aldynda jańa mansaptyq, saıası jáne ákimshilik artyqshylyqtar da paı­da bolady. О́ıtkeni qazaq tili bá­rimizge ortaq birlik pen kelisimniń tili, bolashaǵymyz, erteńimiz, – deıdi Katerına Gedzýr.

Demalys ornynda ótken is-sharalar barysynda volonterlik pen kásipkerlikti ushtastyrý, kom­mýnıkasııa qurý máseleleri, bir­lik pen tatýlyqtyń bas­ty qun­dylyqtary jóninde kvest jáne ult­tyq oıyndar uıymdas­ty­ryldy.

– Jalpy, Qazaqstan halqy Assambleıasy el kóleminde ótip jatqan birde-bir qaıyrymdylyq sharalarynan tys qalyp kórgen emes. Qandaı da bir jaǵdaı oryn ala qalsa, únemi úles, ún qosyp otyrady. Mysaly, Amanqaraǵaı ormany órtke oranǵan kúnderi Assambleıa Qostanaı oblysyna 60 mln teńgeden astam somaǵa 243 tonna gýmanıtarlyq kómek jiberdi. Al búgin qorytyndylanyp jatqan «Birlik» arqyly elimizdiń barlyq óńirinen kelgen jastar, eriktiler bir-birimen jaqyn tanysyp, ózara dostyq qarym-qatynas ornatty, aǵash otyrǵyzý, tabıǵatty aıalaý sııaqty ıgi isterge jastyq jalynmen jumyla kiristi. Prezıdentimiz Qasym-Jomart Kemeluly Toqaev «Birlik – basty qaǵıdamyz, el­diń birligi – elimizdiń damýy men órkendeýi jolyndaǵy bas­ty qun­dylyq» deıdi. Biz osy usta­nym­ǵa berik bolýymyz kerek, – deı­di Aqparat jáne qoǵamdyq damý mınıstrliginiń «Qoǵamdyq keli­sim» RMM jetekshi sarapshysy Nazgúl Dosmaǵanbetova.

Qostanaı oblysy