Qazaq tiline aýdarǵanda «Shabyt» degen uǵymdy bildiretin «Begeisterung» festıvali Qostanaıda osymen jıyrmasynshy ret uıymdastyrylyp otyr. Dástúrli shara bıyl Qazaqstan men Germanııa arasyndaǵy dıplomatııalyq qarym-qatynastyń 30 jyldyǵyna oraılastyryldy.
Festıvalǵa qatysqan jergilikti nemis etnomádenı birlestiginiń ókilderi ózderiniń shyǵarmashylyq, aspazdyq, ismerlik ónerin kórsetti. Merekege jınalǵan kópshilik nemistiń ulttyq taǵamdarynan aýyz tıdi.
Otyz jyl boıy «Vozrojdenıe» birlestigine jetekshilik etip kele jatqan Elena Rýssmannyń aıtýynsha, búginde Qazaqstanda nemis ultynyń 171 myńnan astam ókili turady. Onyń shamamen 25 myńdaıy Qostanaı oblysyn meken etken.
Festıvalge Astana qalasynan arnaıy kelgen Zarına Feller de elimizdegi nemis etnomádenı birlestikteri atqaryp jatqan ıgi sharalarǵa belsendi atsalysyp júr.
– Ata-babalarymyz qazaq topyraǵyna 1940 jyldary jer aýdarylyp kelgen. Sol kisilerden ósip-óngen urpaqpyz. О́z basym ulttyq ortalyqtar jıi ótkizip turatyn merekelerge osydan eki jyl buryn ǵana nemis mektep-gımnazııasynda oqıtyn qyzymnyń yqpalymen shyndap aralasa bastadym. Qazir qyzym nemis tilin ájeptáýir meńgerip aldy. О́zim de til úıretý kýrstaryna baryp, óz ultymnyń tarıhyn, mádenıetin tereńirek oqyp-bilip jatyrmyn, – deıdi Zarına.
«Begeisterung» festıvaline óńirde jumys istep jatqan ózge de ulttyq-mádenı ortalyqtardyń ókilderi qatysty. Olardyń aıtýynsha, mundaı mádenı-tanymdyq merekeler elimizde tatý-tátti beıbit ómir súrip jatqan etnostardyń birligin arttyryp, turmysyn ajarlandyra túsedi.
– Buǵan deıin biz qazaq, slavıan, tatar jáne bashqurt mádenıeti festıvalderin ótkizdik. Búgingi festıval jyl boıy atqaryp kele jatqan is-sharalarymyzdyń zańdy jalǵasy. Mundaı merekelerdi ótkizýdegi basty maqsatymyz – kópshilik qaýymǵa oblysymyzda ómir súrip jatqan ult ókilderiniń mádenıeti men salt-dástúrlerin nasıhattaý. Olardyń arasynan shyqqan qaıratker azamattardyń elge sińirgen eńbegin dáripteý, – deıdi Qostanaıdaǵy Dostyq úıiniń dırektory Natalıa Ramazanova.
Qostanaı oblysy