Senattyń Halyqaralyq qatynastar, qorǵanys jáne qaýipsizdik komıtetiniń tóraǵasy Muhtar Qul-Muhammed Slovakııa Respýblıkasynyń elshisi Robert Kırnagpen kezdesti, dep habarlaıdy Egemen.kz Parlament Senatynyń baspasóz qyzmetine silteme jasap.
Senator bizdiń elderimiz arasynda joǵary deńgeıde senimdi dıalog qalyptasqany, saýda-ekonomıkalyq jáne mádenı-gýmanıtarlyq yntymaqtastyqty damytýǵa qolaıly jaǵdaı jasalǵany týraly dıplomatqa aıtyp berdi. Sońǵy jyldary Qazaqstanǵa Slovakııanyń Premer-mınıstri men Parlament Tóraǵasy, syrtqy ister jáne ekonomıka mınıstrleri kelgen bolatyn. Osynyń bári ekijaqty yntymaqtastyqty nyǵaıtýǵa jáne arttyrýǵa degen ózara umtylystyń kórinisi bolyp otyr.
«Eýropalyq Odaqpen strategııalyq áriptestik turǵysynda Slovakııamen ekijaqty yntymaqtastyqty damytý biz úshin mańyzdy. Bizdiń elimiz «jasyl» ekonomıkaǵa kóshý, saýda jáne ınvestısııa, energetıka, aýyl sharýashylyǵy, kólik jáne logıstıka, klımattyń ózgerýine qarsy kúres, bilim berý, ǵylym jáne t.b. sııaqty basym baǵyttarǵa nazar aýdara otyryp, Qazaqstan men EO arasyndaǵy Keńeıtilgen áriptestik pen yntymaqtastyq týraly kelisimdi iske asyrýda qarqyndy jumys istep keledi», dep atap ótti depýtat.
Muhtar Qul-Muhammed elshimen parlamentaralyq baılanystardy keńeıtýdiń mańyzy men Qazaqstannyń ınvestorlardy tartýǵa múddeli ekenin jáne energetıkalyq qaýipsizdik máselelerin talqylady.
Slovakııa Respýblıkasynyń elshisi óz kezeginde eki eldiń yntymaqtastyǵyn odan ári nyǵaıtýdyń mańyzy týraly aıta kelip, memleketterimiz arasyndaǵy dıplomatııalyq qatynastar ornaǵan sátten bastap 28 jyldan astam ýaqyt ishinde Qazaqstan ózin senimdi saıası jáne ekonomıkalyq áriptes retinde kórsetkenin jetkizdi.