Áýlıekól óńirindegi tabıǵı apat saldarynan úı-qorasy órtenip ketken 91 otbasy taıaýda ǵana aýdan ortalyǵynyń shetinen boı túzegen jańa shaǵyn aýdanǵa qonystanǵan edi. Respýblıka kúni qarsańynda oblys ákiminiń qolynan jańa úıdiń kiltin alyp, qonys toıyn toılaǵan turǵyndardyń qýanyshy uzaqqa barmady.
Jańa úıge kirgen turǵyndar birneshe kúnnen keıin aýladaǵy septıktiń ishi sýǵa tolyp ketkenin baıqaǵan. Áleýmettik jelide tarap, eldiń narazylyǵyn týǵyzǵan vıdeoda «Birlik» shaǵyn aýdanyndaǵy №83 úıdiń turǵyny óz otbasynda 9 adam bar ekenin, munda osydan eki kún buryn ǵana kóship kelgenin, al septıgindegi sýdyń qudyqtyń erneýinen asyp esiktiń aldyna jaıylaıyn dep turǵanyn aıtady.
Oǵan kórshiles úılerdiń de jaǵdaıy máz emes. Buǵan deıin túsken qar 1 qarashada erip, aýlany sý basyp ketken.
«Mynaý №69 úı – meniń úıim. Aýlamyzdy telegeı-teńiz sý basyp qaldy. Balalaryma úıdegi sýdyń shúmegin ashpańdar dedim. Onsyz da sý tolyp ketken septıgimdi kórseteıin desem, jaqyndap bara almaı turmyn», deıdi vıdeodaǵy áıel adam.
Oblystyq qurylys, sáýlet jáne qala qurylysy basqarmasynyń basshysy Berik Tańjaryqovtyń aıtýynsha, bul úılerdiń áý bastaǵy qurylys jobasynda septık qazý qarastyrylmaǵan. Al aýladaǵy ýaqytsha septıkterdi merdigerler ornatypty.
«Kún jylyp, birneshe kún qatarynan qar aralas jańbyr jaýdy. Nátıjesinde, turǵyn úılerdiń aýlalaryna sý jınalyp qaldy. Injenerlik-geologııalyq zertteý boıynsha, úılerdiń irgetasy ylǵal ótkizbeıtin qorǵanyshpen qaptalǵan, úılerge sý kirmeıdi, sý basý qaýpi joq», delingen basqarma basshysynyń atynan kelgen habarlamada.
Artynsha Áýlıekól aýdanynyń ákimi Erlan Temenov sý basqan aýlalarda sý sorǵytý jumystary júrip jatqanyn málimdedi.
«91 úıli «Birlik» shaǵyn aýdanynda 12 úıdiń aýlasyn sý basyp qaldy. Bul úılerdiń irgetasy ylǵal ótkizbeıdi. Úıge sý kiredi dep alańdaýǵa negiz joq. Qazir 4 tehnıka, 2 motosorǵy, oǵan qosa 25 adam sý sorǵytý jumystarymen aınalysyp jatyr», dedi Áýlıekól aýdanynyń ákimi Erlan Temenov.
Oblystyq qurylys, sáýlet jáne qala qurylysy basqarmasynyń basshysy aldaǵy ýaqytta «Birlik» shaǵyn aýdanyndaǵy úılerge káriz qubyrlary tartylatynyn, qazir onyń smetalyq qujattary ázirlenip jatqanyn aıtty.
Qostanaı oblysy