Túrkııanyń Antalııa qalasynda ótken ITF World Tennis Tour W15 týrnırinde qazaqtyń daryndy tennısshisi Arýjan Saǵyndyqova top jardy.
Taıpeılik Iý-Iýn Lımen juptasyp óner kórsetken 17 jastaǵy Team Kazakhstan akademııasynyń túlegi barlyq qarsylasyn sypyra utyp, fınalda reseılik Anastasııa men Rada Zolotarevalardan 7:5, 3:6, 10:4 esebimen basym tústi. Osylaısha, qazaq qyzy óziniń sporttyq mansabynda alǵash ret eresekter arasyndaǵy ITF týrnırinde bas júldeni oljalady. «Osyndaı eleýli tabysqa jetkenime qatty qýanyp otyrmyn. Dál qazir qandaı sezimde ekenimdi dóp basyp aıtýdyń ózi qıyn. Bul men úshin bıylǵy maýsymdaǵy eń qýanyshty sát. Sóz oraıy kelgende maǵan únemi qoldaý kórsetip júrgen Qazaqstan tennıs federasııasyna, sol uıymnyń prezıdenti Bolat О́temuratovqa jáne ózimniń jeke bapkerim Rýslan Muhamedzıanovqa sheksiz alǵysymdy bildirgim keledi», dep Arýjan aǵynan jaryldy.
Jekelegen saıysta Arýjan Saǵyndyqova shırek fınalǵa deıin jetti. Sol mejede ol serbııalyq Natalııa Senıchke 6:3, 1:6, 5:7 esebimen ese jiberdi.