Atyraý óńirine medısına mamandaryn tartý úshin arnaıy baǵdarlama ázirlenedi. Bul týraly Memleket basshysy Qasym-Jomart Toqaev oblys jurtshylyǵymen kezdesý barysynda aıtty, dep habarlaıdy Egemen.kz.
«Eń aldymen, óńirge medısına mamandaryn tartý úshin arnaıy baǵdarlama ázirleý kerek. Jergilikti kadrlardyń biliktiligin arttyrý mańyzdy. Sondaı-aq, oblystyq perzenthanany kúrdeli jóndeýden ótkizip, jabdyqtaǵan jón. Atyraýda jańa onkologııalyq dıspanser salý máselesin pysyqtaý qajet», dedi Prezıdent.
Memleket basshysynyń aıtýynsha, oblysta birqatar densaýlyq saqtaý nysanynyń qurylysy josparlanyp otyr.
«Qurylys jumystaryn kelesi jyly bastaý kerek. Ana men balanyń, jalpy turǵyndardyń densaýlyǵyn saqtaý – eldiń damý deńgeıin aıqyndaıtyn kórsetkishtiń biri. Biz densaýlyq saqtaý salasyna barlyq resýrsty, kúsh-jigerimizdi jumyldyramyz. Osy oraıda, men sıntetıkalyq esirtki máselesine erekshe nazar aýdarǵym keledi», dedi Qasym-Jomart Toqaev.
Bul rette Prezıdent Qazaqstanda esirtkige táýeldi 110 myń adam esepte turǵanyn aıtty.
«О́kinishke qaraı, adam psıhıkasyna áser etetin zattar tez taralyp bara jatyr. Bul – óte qaýipti úrdis. Qazaqstanda esirtkige táýeldi 110 myń adam esepte tur. Onyń ishinde balalar da bar. Bul – biz biletin málimet qana. Osy rette, Ishki ister mınıstrliginiń esirtkige qarsy kúresti tıimdi júrgizýin talap etemin», dedi Memleket basshysy.