Memleket basshysy otandyq bızneske atsalysyp júrgen kásipkerlerge memleket jan-jaqty qoldaý kórsetetinin aıtty, dep habarlaıdy Egemen.kz.
«Egemen elimizdi órkendetý – bárimizdiń ortaq maqsatymyz. Bul jumysqa túrli sala mamandary, sonyń ishinde isker azamattar da atsalysyp júr. Bıznes ókilderi memleketti damytý isinde óte mańyzdy ról atqarady. Men kásipkerlermen kezdeskende bıznestiń áleýmettik jaýapkershiligi týraly jıi aıtamyn. Munyń aıryqsha mán-mańyzy bar», dedi Prezıdent.
Budan soń, ol otandyq bızneske atsalysyp júrgen kásipkerlerge memleket jan-jaqty qoldaý kórsetetinin atap ótti.
«Atyraý óńirinde el ómirine belsene aralasyp júrgen mesenat azamattarymyz barshylyq. Osy oraıda, jergilikti kásipkerlerge jáne óńir turǵyndaryna shynaıy rızashylyǵymdy bildirgim keledi. Atyraýlyqtar elordamyzdyń 20 jyldyǵyna tamasha tartý jasaǵanyn búkil el biledi. Esildiń ústine salynǵan bekire balyǵy tárizdi kópir – Astananyń kórkin asha túsken biregeı nysannyń biri.
Sol sııaqty Túrkistandaǵy «Uly dala eli» ortalyǵy – Atyraý jurtynyń syıy. Muny memleket te, halqymyz da joǵary baǵalaıdy. Árıne, basqa aımaqtar da ortaq iske óz úlesin qosyp keledi. Osyndaı janashyrlyq pen yntymaqtyń arqasynda eldigimiz nyǵaıady», dedi Memleket basshysy.
Sondaı-aq ol keleshekte aımaqtardan osyndaı syılyqtar talap etilmeıtinin, árbir oblys óz kúshimen, Úkimettiń kómegimen, ınvestorlardyń qoldaýymen óz jumystaryn ózderi atqarýy keregin aıtty.