Memleket basshysy urpaqtyń sanasy sergek bolsyn desek, el úshin erlik jasaǵan ul-qyzdarymyzdyń esimin este saqtaý kerek ekenin aıtty, dep jazady Egemen.kz.
«Jalpy, ár óńirdegi isker azamattar, eń aldymen, óziniń týǵan jerin kórkeıtýge atsalysýy kerek. Biz qoǵamda ózara jaýapkershilik ıdeologııasyn, mesenattyq qyzmetti dáripteı berýimiz qajet. Munyń bári órkenıetti qoǵam qurý úshin óte mańyzdy.Árkim «Atyraýǵa ákeler me em bir taýdy» dep jyrlaǵan Tabyldy Dosymov sııaqty týǵan jerin súıe alsa, týǵan eliniń damýyna úles qossa, Otanymyz órkendeı túseri sózsiz. Batys aımaqtarǵa kelgende Álııa, Mánshúk, Hıýaz sııaqty qaharman qyzdarymyz týraly aıtpaý múmkin emes. Halqymyz qashanda batyrlaryn baǵalaı bilgen. Osy aımaqtaǵy áýejaılarymyz qazaqtyń 3 batyr qyzynyń esimimen atalýy – sonyń aıqyn kórinisi. «Er esimi – el esinde» degen sóz bar. Biz urpaqtyń sanasy sergek bolsyn desek, el úshin erlik jasaǵan ul-qyzdarymyzdyń esimin este saqtaýymyz kerek. Bul – men úshin myzǵymas ustanym», dep sózin aıaqtady Memleket basyshysy Atyraý oblysynyń jurtshylyǵymen kezdesý barysynda.