Qostanaıda jas sýretshiler men dekoratıvti-qoldanbaly óner sheberleriniń «Jas tolqyn» respýblıkalyq baıqaýy márege jetti. Osymen tórtinshi ret uıymdastyrylyp otyrǵan dástúrli shara bıyl ult ustazy Ahmet Baıtursynulynyń 150 jyldyǵy men Balalar jylyna oraılastyrylyp otyr.
Baıqaýǵa Astana, Qaraǵandy, Chelıabi qalalary men Qostanaı oblysynyń 16-35 jas aralyǵyndaǵy qylqalam sheberlerinen uzyn sany 80-nen astam týyndy kelip tústi. Qazylar alqasy olardy «Beıneleý óneri», «Grafıka», «Músin», «Dekoratıvti-qoldanbaly qolóner» dep atalatyn 4 atalym boıynsha baǵalady.
– Bıylǵy konkýrsta akvarelmen salatyn sýretshilerdiń, grafıkter men dekoratıvti-qoldanbaly óner sheberleriniń jumystary erekshe. Baıqaýǵa qatysýshylardyń ishinde kásibı sýretshilermen qatar, áýesqoı jastar da bar. Jumystardy baǵalaý barysynda qınalyńqyrap qalǵan kezderimiz boldy. Sondyqtan uıymdastyrýshylarǵa konkýrs bıýdjetin ulǵaıtyp, áýesqoı sýretshilerge arnalǵan jeke atalym taǵaıyndaý týraly ótinish aıttyq, – deıdi qazylar alqasynyń múshesi Márııa Jumaǵulova.
Oblystyq mádenıet basqarmasynyń basshysy Erlan Qalmaqovtyń aıtýynsha, baıqaýdyń mazmunymen qosa, geografııasy da jyl sanap keńip keledi. Konkýrsqa qatysýshylar arasyndaǵy báseke de joǵary. Mysaly, bıylǵy baıqaýǵa Reseıden birneshe qylqalam sheberi óz jumystaryn jibergen.
Qazylar alqasy «Jas tolqyn» baıqaýynyń Gran-prı syılyǵyna Astana qalasynan kelgen daryndy sýretshi Aıdana Minaıdarovany laıyq dep uıǵarypty. Jas qylqalam sheberiniń qolynan qaǵazǵa tamǵan akvarel boıaýlar rasymen de sábıdiń janaryndaǵy móp-móldir álemniń shynaıy beınesindeı bolyp tuna qalǵan.
Lısakov qalasynan kelgen kásibı sýretshi Irına Kropotova «Grafıka» atalymy boıynsha jeńimpaz atandy. Al 17 jastaǵy Vıktorııa Borodkına «Dekoratıvti-qoldanbaly óner» atalymy boıynsha birinshi oryndy ıelendi.
Qazylardyń aıtýynsha, konkýrsqa qatysqan sheberlerdiń shyǵarmalarynda qaǵaz saz, kendir jip, kómir, monshaq, jún sııaqty neshe túrli dúnıeler de paıdalanylǵan. Mysaly, «Músin» atalymy boıynsha 34 jastaǵy muǵalim Alekseı Mahovskııdiń týyndysy ozyq shyqty. Áýesqoı músinshi qaǵaz sazdan jasalǵan kompozısııalyq týyndysyna ana men balanyń arasyndaǵy súıispenshilikti arqaý etken.
Qaǵaz saz degen kádimgi dárethana qaǵazyn jelimge, kúnbaǵys maıy men suıyq sabynǵa shylap ıi qanǵan soń, birneshe saǵat tońazytqyshqa qoıǵannan keıin alynatyn materıal eken. Jumsaq kúıinde kádimgi plastılınge, qatty kúıde gıpske uqsaıdy. Alekseı Mahovskıı Sarykól aýdanyna qarasty Veselyı Podol aýylyndaǵy mektepte muǵalim bolyp jumys isteıdi.
Qostanaı oblysy