Shotlandııanyń Glazgo qalasynda tennısten Bıllı Djın Kıng kýbogy jolyndaǵy jarys bastaldy. Álemniń eń úzdik 12 komandasynyń qatysýymen ótip jatqan dástúrli týrnırdiń tusaýkeser kezdesýin jerlesterimiz keshe Ulybrıtanııa quramasymen ótkizdi.
Qazaqstanǵa qaraǵanda Ulybrıtanııanyń atalǵan jarysta jınaǵan tájirıbesi áldeqaıda zor ekeni aıtpasa da túsinikti. Osy kúnge deıin olardyń bas júldege qoly jetpegenimen, esesine tórt ret fınalda oınady. Osy jaıttyń ózi-aq kóp nárseni ańǵartsa kerek. Tumandy Albıon eliniń eń úzdik oıynshysy Emma Radýkaný bul jarysqa qatyspady. Keıbir derek kózderine sensek, byltyr AQSh-tyń ashyq birinshiliginde aıdy aspanǵa shyǵaryp, bas júldeni oljalaǵan 19 jastaǵy tennısshiniń jaraqaty bar kórinedi. Sol sebepti de Radýkaný bıyl Bıllı Djın Kıng kýboginde óner kórsetýden bas tartqan. Tutastaı alǵanda, Emma bıylǵy maýsymdy joǵary deńgeıde ótkizdi dep aıta almaımyz. Jeńisinen jeńilisi kóp boldy.
Al Qazaqstan quramasy sapyndaǵy árbir oıynshy ózderine artylǵan jaýapkershilik júgin anyq sezindi. Shotlandııaǵa kelgen bette komanda kapıtany Iаroslava Shvedova BAQ ókilderine bergen suhbatynda: «Qazaqstannyń tennısshileri Bıllı Djın Kıng kýboginde tuńǵysh ret qatysqaly otyr. Sol sebepti de osy jarysqa tyńǵylyqty daıarlandyq. Ulttyq komandamyzdyń týy astyna kil myqtylar jınaldy. Bizge tek jalǵyz Zarına Dıas qana jetispeı tur. Ol áli de eski jaraqatynan aıyǵa almaı júr. Áıtpegende Zarınanyń osy týrnırde oınasam degen qulshynysy erekshe edi. Desek te basqa qyzdarymyz babynda. Elena Rybakına men Iýlııa Pýtınseva talaı dúrmekte ysylǵan saqa oıynshylar ekeni ózderińizge málim. Anna Danılına juptyq saıystarda ózin óte jaqsy qyrynan kórsetip júr. Olardyń qataryna Jibek Qulambaeva qosyldy. Ol da komandany kúsheıtedi dep oılaımyz. Bir sózben aıtsaq, osy jarysta barynsha tabysty óner kórsetip, elge abyroımen oralý úshin barymyzdy salamyz», dep aqtaryla sóıledi.
Alǵashqy bolyp kortqa Iýlııa Pýtınseva men Ketı Býlter shyqty. 26 jastaǵy Lesterdiń týmasy bul kúnderi WTA reıtınginde 124 orynda tur. Jerlesimiz úzdikter tiziminde 51 satyǵa jaıǵasqan. Buǵan deıin ekeýi eki márte kezdesip, eki retinde de Iýlııanyń mysy basym boldy. Desek te bul joly birinshi sette Býlter Pýtınsevany utyp ketti. Biraq bul jaǵdaı tájirıbeli tennısshiniń jigerin jasyta alǵan joq. Odan keıin jınaqy oınaǵan Iýlııa qalǵan eki setti óz paıdasyna sheshti. 2 saǵat 10 mınýtqa sozylǵan saıys 4:6, 6:3, 6:2 esebimen aıaqtaldy.
– Iá, men oıyndy óte sylbyr bastaǵanymdy moıyndaımyn. Onyń ózindik sebebi de bar. О́ıtkeni, biz jattyǵý jasaǵan kort pen jarys ótip jatqan korttyń biraz aıyrmashylyǵy bar. Soǵan beıimdelý úshin biraz ýaqyt ketti. Birte-birte oıynym júre bastady. Aqyry jeńiske jetip, komanda qorjynyna qajetti upaıdy saldym. Eń bastysy – osy! Endigi úmitimiz – Elena Rybakınada, – dep Iýlııa Pýtınseva óz oıymen bólisti.
Kelesi kezdesý Elena Rybakına men Herrıet Dart arasynda ótti. Londonda dúnıege kelgen Herrıet te 1996 jyldyń týmasy. Álemdik reıtıngte ol 97 satyǵa turaqtasa, Elena 22 oryndy ıelengen. Elimizdiń birinshi raketkasy bul básekede qarsylasyn bas kótertpeı utty. Esep – 6:1, 6:4. Odan keıin juptyq saıysty tamashaladyq. Bul kezdesýde Rybakına men Anna Danılınaǵa senim artyldy. Olar Alısııa Barnett pen Olıvııa Nıkkolstan 5:7, 3:6 esebimen utylyp qaldy. Soǵan qaramastan Qazaqstan quramasy tusaýkeser kezdesýin jeńispen aıaqtady. Kelesi kezdesýin jerlesterimiz keshe Ispanııa tennısshilerimen ótkizdi.
Esterińizge sala keteıik, Bıllı Djın Kıng kýbogi jolyndaǵy jarystyń ózge toptarynda myna komandalar ózara sheberlik kórsetip jatyr: A toby – Shveısarııa, Kanada jáne Italııa. V toby – Aýstralııa, Slovakııa jáne Belgııa. D toby – Chehııa, AQSh jáne Polsha. Ár toptyń úzdik komandalary jartylaı fınalǵa joldama alady. Al atalǵan jarystyń jeńimpazy 13 qarashada anyqtalady.