Jyl basynan beri elimizde jol apatynan eki myńnan astam adam qaıtys boldy, dep habarlaıdy Egemen.kz.
«Bıyl jol-kólik apatynan 2 myńnan astam adam qaza tapty, 15 myńnan astam adam ártúrli aýyrlyqtaǵy jaraqat aldy. Qarasha aıynyń ózinde 300-den astam jazataıym oqıǵa oryn alyp, 60-qa jýyq adam qaza tapqan, 400-ge jýyq adam jaraqat alǵan», dedi QR IIM-niń ókili Shuǵyla Turlybek.
Ishki ister mınıstrligi Jambyl oblysynda bolǵan jantúrshigerlik oqıǵany eske saldy. Audi 100 kóligi qaýipsizdikke kóz jetkizbeı, temir jolǵa shyǵyp ketken. Saldarynan jolaýshylar poıyzymen soqtyǵysyp, júrgizýshi men bes jolaýshy oqıǵa ornynda kóz jumdy. Qostanaı oblysynda Chevrolet kóliginiń júrgizýshisi rýlge ıe bola almaı, aryqqa aýdarylyp qaldy. Saldarynan úsh adam qaza taýyp, bireýi jaraqat aldy.
Ishki ister mınıstrligi qazaqstandyqtardy jolda júrý erejelerin qatań saqtaýǵa shaqyrady.
«Qarasha aıynan bastap aýa raıy kúrt nasharlady. Adamdar bul aýa raıyna birden úırene almaıtyndyqtan, qysqy jolda (muzda, jańa túsken qarda) kólik júrgizgen kezde aýa raıynyń áserine nazar aýdaryp, saq bolý kerek. Kólik kenet toqtaı almaıtyndyqtan, jaıaý júrginshiler aınalaǵa erekshe nazar aýdarǵany jón. Sondyqtan joldy kesip ótkende júrgizýshiniń jol berip, sodan keıin ǵana júrýdi jalǵastyrýyn qadaǵalaý kerek. Sonymen qatar qulaqqap, telefon, kapıýshon adamnyń zeıinine úlken kedergi keltiretinin eskerý qajet», dedi Sh.Turlybek.
Sondaı-aq zańnamaǵa sáıkes qysqy dóńgelektermen jabdyqtalmaǵan kólikterdi qysta paıdalanýǵa tyıym salynǵanyn eske túsirdi. Kólik ıeleri aýa-raıynyń ózgerýin muqııat qadaǵalap, nasharlaǵan jaǵdaıda eldi mekenderden tys jerlerde júrýdi shekteýi kerek», dedi IIM ókili.