Almatyda ústel tennısinen jasóspirimder arasynda ótken «Myqtylar týrnıri» óz máresine jetti. Respýblıkamyzdyń birqatar óńirinen jınalǵan jetkinshekterdiń jarysyn jankúıerler qyzyǵa tamashalady. Sebebi qazirgi kezde sporttyń osy túrin serik etken tennısshilerimiz halyqaralyq arenada eleýli tabystarǵa qol jetkizip júr. Al búgin ADD ortalyǵynda óner kórsetken jetkinshekter erteńgi kúni ulttyq qurama sapyndaǵy sportshylardy almastyratyny anyq.
Qazaqstannyń búgingi tańdaǵy eń úzdik ústel tennısshisi Kırıll Gerasımenko ekenin jurt jaqsy biledi. 25 jastaǵy jerlesimiz 2016 jyly Rıo-de-Janeıro jáne 2021 jyly Tokıo Olımpıadalaryna qatysty. Kezinde Gerasımenko «World Tour Hungarian Open», «ITTF Challenge Spanish Open» jáne «2021 ITTF Kazakhstan International Open» týrnırlerin utyp, basqa da kóptegen dúbirli dodada júldegerler sanatyna qosyldy. Birer jyldan beri ol Aýstrııa men Germanııanyń eń úzdik klýbtary sapynda óner kórsetip júr. Qazirgi kezde Kırıll álemdik reıtıngte 31-oryndy ıelenýde. Bul – burynǵy Keńes odaǵy quramynda bolǵan «baýyrlas» respýblıkalar ókilderi arasyndaǵy eń úzdik kórsetkish. О́zgelerdi aıtpaǵanda, múıizderi qaraǵaıdaı Reseı men Ýkraına sekildi memleketterdiń tennısshileri osy deńgeıge jete alǵan joq.
Qazaqstannyń ózge oıynshylary mynadaı satylarǵa jaıǵasty: Aıdos Kenjeǵulov – 300, Alan Qurmanǵalıev – 324, Vladıslav Zaharov – 403, Erık Raıter – 446, Dastan Kenjeǵulov – 459, Baqdáýlet Ákimáli – 477 jáne Saǵyntaı Qurmanbaev – 478.
Kóshbasshylar jaıynda aıtar bolsaq, álemdik reıtıngtegi alǵashqy úsh oryndy Qytaıdyń sportshylary oljalap otyr. Olar – Fan Chjendon, Ma Lon jáne Van Chýsın. Alǵashqy eki oryndy enshilegen sańlaqtardyń Olımpııa oıyndary men álem chempıonattarynyń birneshe dúrkin jeńimpazdary degen ataqtary bar. Al Van Chýsın – úzdikter sanatyna keıinnen ǵana qosylǵan daryndy jas. Sondaı-aq TOP-10-dyqtyń qatarynda Tomakazý Harımoto (Japonııa), Trýls Moregard (Shvesııa), Lıan Szınkýn (Qytaı), Ýgo Kalderano (Brazılııa), Lın Iýnjý (Taıpeı), Dmıtrıı Ovcharov (Germanııa) jáne Darko Iorgıch (Slovenııa) bar.
Áıelder arasynda da azııalyqtar aldaryna jan salar emes. Álemdik reıtıngtegi ozyq 10 oıynshynyń toǵyzy solar. Ásirese Qytaı quramasynyń qarqyny óte kúshti. Alǵashqy tórt oryndy Qytaı eliniń arýlary ıelenip otyr. Olar – Sýn Insha, Chen Men, Van Manıý jáne Van Idı. Besinshi jáne altynshy oryndardy japonııalyq Mıma Ita men Hına Haıata enshileýde. Odan keıingi satylarǵa Chen Sıntýn (Qytaı), Kasýmı Ishıkava (Japonııa), Dý Hoı Kem (Gonkong) jáne Han In (Germanııa) turaqtaǵan. Qazaq qyzdary arasynan Záýresh Aqasheva eń úzdik kórsetkishke ıe. Ol ITTF tiziminde 139-orynda tur. О́zge jerlesterimiz mynadaı satylarǵa taban tiredi: Sarvınoz Myrqadyrova – 213, Anastasııa Lavrova – 214, Aııa Álimbaeva – 275, Angelına Romanovskaıa – 310, Ánel Baqyt – 336, Janerke Kóshkimbaeva – 471, Aleksandra Smırnova – 472 jáne Araı Áshkeeva – 475.
Almatyda ótken jarysta da elimizde asa daryndy jas órenderdiń qalyń shoǵyry ósip kele jatqanyn anyq ańǵardyq. Rasynda da, olardyń óreli ónerin kóre otyryp, kóńilimiz toldy. Máselen, 15 jasqa deıingi oıynshylar arasynda top jarǵan shymkenttik Nurıslam Qasym 15 kezdesýdiń barlyǵynda jeńiske jetti. Nátıjesinde ol bas júldeni oljalasa, óskemendik Arnur Oralhanov kúmispen kúpteldi. Qola medal qostanaılyq Temirlan Baltashqa buıyrdy.
Qyzdar saıysynda Elızaveta Lavrova aldyna jan salmady. Astanalyq sportshy 15 kezdesýdiń 14-inde jeńis toıyn toılady. Ekinshi jáne úshinshi oryndardy shymkenttik Aqnıet Amankeldi men tarazdyq Shuǵyla Muqash ıelendi.
18 jasqa deıingiler arasynda tanymal ústel tennısshisi Kırıll Gerasımenkonyń inisi – Tımofeıdiń mereıi ústem boldy. Astanadan kelgen oıynshy 14 kezdesýdiń úsheýinde ǵana utyldy. Almatylyq Shı Danııan ekinshi oryn alsa, qaraǵandylyq Temirlan Kım úzdik úshtikti túıindedi. Dál sol jastaǵy qyzdar arasynda júldeli oryndardyń barlyǵyn kenshiler qalasynyń ókilderi enshiledi. Atap aıtsaq, Janerke Kóshkimbaeva qarsylas shaq keltirmeı, altynnan alqa taqty. Aleksandra Smırnova men Vıktorııa Mochalkına kúmis pen qola medalderdi moıyndaryna ildi.