Aldaǵy jeti jylda memlekettik qyzmetterdiń 90%-y proaktıvti formatta kórsetiledi Bul týraly Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın Strategııalyq bastamalar forýmynda sóılegen sózinde málimdedi, dep habarlaıdy Egemen.kz.
«Sıfrly Qazaqstannyń bolashaǵy týraly aıtatyn bolsaq, sıfrlyq tehnologııalardy engizý barysynda eń bastysy adamdardyń ózderine baǵdarlaný qajet. Bizdiń sıfrlyq Úkimet retindegi mindetimiz - búkil Úkimettiń adamǵa bet burýyn jáne áldeqaıda tıimdi bolýyn qamtamasyz etý. Iаǵnı, kez kelgen adam smartfon arqyly qajetti qyzmetterge qol jetkizýi kerek», dedi Baǵdat Mýsın forým barysynda.
Mınıstrdiń aıtýynsha, sıfrlyq tehnologııalar kúndelikti ómirge neǵurlym kóp ense, Úkimet qabyldaǵan sheshimder soǵurlym tıimdi bolady.
«Shamamen jeti jyldan keıin memlekettik qyzmetterdiń 90%-y proaktıvti formatta kórsetiledi. Sonda memleket qandaı da bir paıymdaýlar negizinde emes, memlekettik jáne memlekettik emes derekter bazalary arqyly jınalǵan derekter negizinde sheshim shyǵarady», dep túsindirdi B. Mýsın.