Taıaýda Qonaev qalasynda dzıýdodan Qazaqstannyń eńbek sińirgen jattyqtyrýshysy, sambodan álem jáne Azııanyń eki dúrkin chempıony, Álem kýbogi jolyndaǵy jarystyń birneshe dúrkin júldegeri Berik Jetpisbaevtyń qurmetine jasóspirimder arasynda respýblıkalyq týrnır uıymdastyryldy. Oǵan elimizdiń birqatar óńirinen kelgen 200-den asa balǵyn balýan qatysty.
Toqsanynshy jyldary Berik Jetpisbaevtyń ataǵy alysqa jaıyldy. Balaýsa shaǵynan Baqyt Qoqysbekovteı bilikti bapkerden tálim-tárbıe alǵan samboshy ýaqyt oza elimizdiń bedeldi balýandarynyń birine aınaldy. 57 jáne 62 kılo salmaq dárejelerinde beldesken ol 1994 jyly Iýgoslavııanyń Novıt Sad qalasynda jasóspirimderdiń álem birinshiliginde kúmis medaldy ıelense, kelesi jyly Bolgarııanyń bas shahary – Sofııada jastar arasynda ótken álem chempıonatynda bas júldeni oljalady. Odan keıin eresekter dýyna erkin qosylyp, kóptegen baıraqty básekede atoı saldy. Atap aıtsaq, Tokıoda álem chempıonatynyń qola júldegeri, Ulanbatyr men Krasnoıarskide Azııa chempıony, Máskeýde Álem kýboginiń kúmis júldegeri, Kstovoda «Harlampıev memorıalynyń» fınalısi degen ataqtarǵa ıe boldy. Osy tabystarynyń arqasynda Jetpisbaev «Halyqaralyq dárejedegi sport sheberi» normatıvin oryndady.
Berik sambomen qatar dzıýdony da jetik meńgerdi. Áli esimizde,1996 jyly Almatyda Sanjar Jandosovty eske túsirýge arnalǵan halyqaralyq týrnır dúrkirep turyp ótken edi. Ulttyq qurama bapkerleri bul jarysty taıaý kúnderi Atlantada alaýy tutanatyn Olımpııa oıyndary qarsańyndaǵy irikteý syny retinde qarastyrdy. Qatysýshylar qatarynda Jetpisbaev ta boldy. Ol kezde keıipkerimiz bedeldi samboshy retinde ózin moıyndatqanymen, dzıýdo kúresiniń maıtalmandary ony jiti tanymaıtyn. Soǵan qaramastan, Berik tatamıde ózin jaqsy qyrynan kórsetti. Bastapqy beldesýlerinde ol Zeken Shaımerdenov pen Ivan Baǵylaev syndy elimizdiń ataqty dzıýdoshylaryn aıqyn basymdyqpen jeńip, jeńis tuǵyryna kóterildi. Sol kezde sambodan endi ǵana aýysyp kelgen 20 jastaǵy jigittiń halyqaralyq arenada ózderiniń myqtylyǵyn moıyndatyp úlgergen tájirıbeli tatamı sheberlerin «qylqyndyrý» ádisimen utqany Balýan Sholaq atyndaǵy sport saraıyna jınalǵan san myń jankúıerdiń tańdanysyn týdyrǵan edi. Biraq qapııada alǵan jaraqatynyń saldarynan qazaqtyń qaısar ulyna tórtjyldyqtyń basty dodasynda baq synaý baqyty buıyrmady. Desek te, sporttyń bul túrinen de «Sport sheberi» atanǵan Jetpisbaev kóptegen halyqaralyq jarysta el namysyn abyroımen qorǵady.
Bozkilemmen qoshtasqannan keıin keıipkerimiz birer jyl jattyqtyrýshylyq qyzmetpen aınalysty. Bul rette de nesibesiz emes. Berik Sársenbekuly óziniń aýyldasy Azamat Muqanovtyń myqty balýan bolyp qalyptasýyna súbeli úles qosty. Dál osy mamannan tálim-tárbıe alǵan Azamat dzıýdodan álem chempıonatynyń kúmis jáne Azııa oıyndarynyń qola júldegeri, sambodan álem chempıony jáne sol jarystyń tórt dúrkin qola júldegeri degen asa mártebeli ataqtarǵa ıe boldy. Keıinnen ol óziniń jeke kásibin ashty. Biraq qaıda júrse de ol sporttan alystaǵan joq. Jetpisbaev osy kúnge deıin jas jetkinshekter men jalyndy jastarǵa únemi qamqorlyq kórsetip, durys baǵyt-baǵdar berip júr.
Atalǵan týrnırdi tamashalaý úshin onyń dostary, jora-joldastary, burynǵy komandalyq áriptesteri Qonaevqa kóptep keldi. Solardyń arasynan kezinde álemdik jáne qurlyqtyq deńgeıdegi dodalarda daralanǵan Erjan Kenjebaev, Aıdar Qaıyrbaev, Marat Taqanov, Meıirjan Qashaǵanov syndy balýandardy, Rýslan Symtyqov pen Dastan Sádýaqasovtaı maıtalman mamandardy kózimiz shaldy. Básekelerdiń ózine keler bolsaq, jergilikti sport mektebiniń tatamıinde Muhammad Rysylhan, Azamat Nurbaq, Bekzat Erkin, Janbolat Málik, Mahmud Aıdosuly, Janaıym Maratbek, Táýke Dáýletuly, Abdrahman Dáýrenuly, Dinmuhamed Tynyshbek, Dáýren Ybyraıym, Esbol Ábdirahman, Zeınep Tilepbergen, Aıgerim Serjanqyzy, Sulý Aıypbaeva, Naılıa Ákimbaı jáne taǵy basqa balǵyn balýandar óz salmaq dárejeleri boıynsha jeńis tuǵyrynyń eń bıik satysyna kóterilip, kórermenderdiń qoshemetine bólendi.
– Meniń ómirde de, sporta da ustazdarym myqty boldy. Bozkilemde Baqyt Qoqysbekov, Kereı Qoıshybek, Manarbek Taýtanov syndy bilgir bapkerlerden kóp nárse úırendim. О́mirde Qaırat Meırembaev, Qaırat Sharabasov, Radj Mımashuly, Alpys Raqymov, Erjan Kenjebaevtan úlken taǵylym men jaqsy tálim-tárbıe aldym. Osy azamattarǵa men máńgi qaryzdarmyn. Allaǵa shúkir, sportta biraz belesti baǵyndyrdym. Dúbirli dodalarda el namysyn abyroımen qorǵadym. Bapker retinde de moıyndaldym. Endi ósip kele jatqan jastarǵa qamqorlyq kórsetip, olarǵa durys baǵyt-baǵdar berýdi ózime mindet sanaımyn. Sol úshin de jergilikti azamattarmen birlese otyryp, Qonaev qalasynda osyndaı týrnır uıymdastyryp jatqan jaıymyz bar. Árıne, bul jarysta kúresip jatqan jas jetkinshekterdiń barlyǵy da keleshekte chempıon bolmaıtyny anyq. Biraq biz úshin basty nárse bul emes. Bizdiń mindet – jastardy salamatty ómir saltyna yntalandyryp, olardy Otanyn súıetin, týǵan jerin qasterleıtin, deni saý, rýhy myqty, parasaty bıik azamattar etip tárbıeleý, – deıdi Berik Jetpisbaev.
QONAEV