HR maman: Otandyq jáne sheteldik sarapshy kózqarasy

Forýmda sarapshylar memle­ket­tik qyzmettegi HR máse­le­sin, onyń ishinde personaldy stra­te­gııalyq basqarýǵa kóshýdiń te­tik­te­­rin sóz etti. 

– Qazir mem­le­­kettik qyzmetke ornalasý kon­kýrs­ta­ry­nyń ádil­­digin qam­ta­masyz etý úshin «E-qyz­met» aqparattyq jú­ıesiniń syrt­qy por­ta­lynda memlekettik qyz­metke jańa irikteý algorıtmi ázir­lenip, konkýrstyq rásimdi ótki­zý formaty qaıta qaraldy. Konkýrstyq rásimniń jańa formaty úmitkerlerge aldyn ala bel­gilengen ýaqytta ótetin áń­gi­­melesýden basqa, bar­­lyq ke­zeń­de, ýaqyt­ta jáne álemniń kez kelgen je­rinen kon­kýrs­qa qatysýǵa múmkindik beredi. Irikteýdiń bul tásil­derin 2023 jyly «E-qyzmet» aqparattyq júıe­sinde qanatqaqty aprobasııadan ótkizý jos­parlanyp otyr, – dedi Memlekettik qyzmet isteri agenttiginiń tóraǵasy Darhan Jazyqbaev.

Qazir elimiz HR mamandaryn daıarlaýǵa den qoıǵan. Mem­le­ket­tik qyzmet isteri agentti­giniń málimetinshe, Qazaqstanda 15 jo­ǵary oqý orny osy sala bo­ıynsha maman daıarlaıdy. Sonyń ishinde bakalavr – 8, magıstratýra deńgeıinde 10 bilim baǵdarlamasy bar.

Ázerbaıjan Memlekettik em­tı­han ortalyǵy tóraǵasynyń orynbasary Bahram Halılovtiń aıtýynsha, bul elde memlekettik qyzmetke qabyldanatyn úmit­ker­diń biliktiligine basty nazar aýdarylady.

– Dál qazir biz memlekettik qyz­mettiń quzy­ret­tilik modeline ótý máselesin qarastyryp jatyrmyz. Buǵan deıin Belgııanyń tájirıbesin zerttedik. Olarda da bul salada problema bar. Biz aldymen HR basqarmalarynyń basshylarynan bastadyq. Olarǵa arnap trenıngter, túsindirý jumystaryn júrgizdik. Barlyq mınıstrliktegi qyzmetkerlermen suhbat ótkizip, olarǵa qandaı quzyret­tilik qajet ekenin baı­qaý­ǵa tyrystyq. Quzy­ret­tilik óte kóp eken, biz otyzǵa jýyq quzy­ret­­tilikti anyqtadyq. Bazalyq quzy­ret­tilikterdi test arqyly anyq­­taýǵa bolady. Al keıbir quzy­ret­­terdi betpe-bet áńgimelesý ar­qyly ǵana baǵalaýǵa bolady, – dedi B. Halılov.

Al Astana memlekettik qyzmet haby basqarýshy komıtetiniń tóraǵasy Álıhan Baımenov basshy laýazymdarǵa irikteý barysynda adamdardy tyńdaı bilý, kommýnıkasııalyq qabi­letter, áriptestik ornatý, kreatıvti oılaý, keı ýaqyttarda buqara aldynda sóıleý qabiletin anyqtaý mańyzdy dep sanaıdy.

– Memlekettik qyzmetshiler qyzmetiniń sapasyna kor­po­ra­tıv­tik mádenıet pen orta erekshe yqpal etedi. Adamı resýrstardyń adamı kapıtalǵa aınalýy úshin durys qundylyqtar, úlgili qa­rym-qa­ty­nas jáne ynta bolýy qajet. Ár bas­shynyń óz qaramaǵyndaǵy azamattarmen jalpy azamattardyń eńbegin, ýaqytyn, abyroıyn­ jáne haqyn qadirleıtin qundylyqtar bolýy qajet. Bul olardyń bilim-biliktiligin jáne áleýetin ashýǵa tolyq múmkindik beredi, – dedi Á.Baımenov.

Koreıa bolsa búgingi tańda personaldy bas­qa­rýdyń elek­trondyq júıesine (e-Saram) kóshken. Sondaı-aq olar adam resýrstaryn damytýǵa kóbirek kóńil bóledi. Qyzmetkerleri únemi túrli trenıngterde, elektrondy oqytý kýrstarynda biliktilikterin arttyrady, olarǵa tok-shoý formatynda talqylaý, pikirlesý alańy uıymdastyrylady. Buǵan qosa proaktıvti bas­qa­rý­dy qolǵa alǵan.

– Proaktıvti basqarýdyń qyz­metker úshin mańyzy óte zor. О́ıt­keni biz olarǵa qarjylyq qol­daý kórsetemiz. Máselen, bir qyz­metkerdiń basyna is tússe, olar­ǵa qorǵan bolýǵa tyrysamyz. Sot úderisi bola qalǵan jaǵdaıda onyń shyǵyndaryn ótep beremiz. Ár qyzmetkerge jyl saıyn 70 myń dollarǵa deıin qarjy bólemiz, – dedi Koreıa Respýblıkasy Adamı resýrstardy damytý ulttyq ınstıtýty Ǵylymı-zertteý ortalyǵynyń bas dırektory Chýn Djı Iýn.

Jalpy, forýmǵa 7 elden kelgen spıkerler men barlyǵy 300-den astam adam qatysty.

– Forým barysynda kóterilgen basty suraq­tardyń biri – búgingi kúni memlekettik qyzmet­shi­lerdiń deńgeıi qandaı? Qoǵamnyń talaptaryna jaýap bere me? Bul másele Memleket basshysynyń joldaýlarynda da aıtylǵan edi. Forým osy suraqtarǵa jaýap berdi dep oılaımyn. Memlekettik qyzmetshilerdiń biliktiligin kóterý jáne halyqtyń únine qulaq asatyn apparatty qurý joldary aıqyndalýǵa tıis. Árıne, talqylanǵan máseleler bir kúnniń ishinde sheshimin tappasa da, aldaǵy ýaqytta naqty qadamdarǵa alyp keleri anyq. Sonymen qa­tar ár memlekettik qyzmetshi ózi­niń biliktiligin qashanda arttyryp turýǵa tıis dep sanaımyn. Bul tusta, Memlekettik qyzmet is­teri agenttigi men Akademııa ta­rapynan óte kóp bastamalar qolǵa alyndy, – dedi is-sharany qo­rytyndylaǵan Prezıdent ja­nyndaǵy memlekettik basqarý akademııasynyń vıse-rektory Erkin Dúsipov.