Memleket basshysy Stadler Rail AG kompanııasy dırektorlar keńesiniń tóraǵasy Peter Shpýlerdi qabyldady, dep habarlaıdy Egemen.kz Prezıdenttiń baspasóz qyzmetine silteme jasap.
Kezdesý barysynda Qazaqstanda jolaýshylar vagondaryn jasaý jónindegi jobany júzege asyrý máseleleri talqylandy.
Memleket basshysyna shveısarııalyq Stadler Rail AG kompanııasynyń vagon jasaý zaýytyn jańǵyrtý, Qazaqstan alıýmınııin paıdalaný jáne óndiristiń tolyq sıklyn jolǵa qoıý jospary týraly málimet berildi.
Peter Shpýler 2030 jylǵa qaraı óndiriske qajet bólshekterdi jergilikti jerde óndirý deńgeıin 35 paıyzǵa deıin arttyrý, sondaı-aq qazaqstandyq ónimmen eksportqa shyǵý jospary týraly aıtty. Sonymen qatar olar óndiristik bilim men sarapshylyq quzyretterdi úıretý máselelerin qarastyrdy.
Kompanııa qazaqstandyq jastarǵa arnalǵan oqý ortalyqtaryn uıymdastyrýdy, sondaı-aq otandyq kolledjdermen jáne ýnıversıtettermen qarym-qatynas ornatýdy josparlap otyr.
Prezıdent birlesken jobanyń júzege asyrylýy Qazaqstan men Shveısarııa arasyndaǵy saýda-ekonomıkalyq yntymaqtastyqty nyǵaıta túsetinine senim bildirdi.