Ekonomıkalyq saıasat, ınnovasııalyq damý jáne kásipkerlik komıtetiniń depýtattary 194 kásiporny bar «Astana – jańa qala» arnaıy ekonomıkalyq aımaǵynyń qyzmetimen tanysty. AEA-daǵy kásiporyndar mashına jasaý, hımııa, jeńil ónerkásip jáne basqa salalarda da taýarlar shyǵarýmen aınalysady, dep habarlaıdy Egemen.kz Senattyń baspasóz qyzmetine silteme jasap.
Senatorlar sapar barysynda elektrovozdar, aýyl sharýashylyǵy jáne orman sharýashylyǵy jabdyqtaryn qurastyrý, medısınalyq maqsattaǵy buıymdar, parfıýmerııalyq jáne kosmetıkalyq ónimder shyǵaratyn zaýyttardyń qyzmetimen tanysty.
Depýtattar birqatar kásiporyndardyń qyzmetkerlerimen óndiristegi qalyptasqan problemalyq máseleler men olardy sheshýdiń yqtımal joldaryn, sondaı-aq odan ári damý keleshegin de talqylady.
«Arnaıy ekonomıkalyq aımaqtar úshin qajetti ınfraqurylymdy jasaý problemalary, basym qyzmet túrlerin keńeıtý rásimderiniń kúrdeliligi, jańa ótkizý naryǵy men qajetti shıkizat máselesi ótkir kúıinde qalyp otyr», dedi Dáýren Ádilbekov.
Komıtet depýtattary barlyq kóterilgen máselelerdi zańnamalyq qyzmet aıasynda nazarǵa alady.
Respýblıka boıynsha 1,2 trıllıon teńgeni quraıtyn 300-den astam joba júzege asyp jatqan 13 arnaıy ekonomıkalyq aımaq bar. Onda 22,5 myńnan astam adam jumyspen qamtylǵannyn atap ótken jón.