Qorǵanys mınıstrligi men Qarjy naryǵyn retteý jáne damytý agenttigi merzimdi qyzmettiń sarbazdaryna «nesıelik demalys» berý týraly memorandýmdy bekitti, dep habarlaıdy Egemen.kz Qorǵanys mınıstrliginiń baspasóz qyzmetine silteme jasap.
Qujatqa qos vedomstvo basshysy general-polkovnık Rýslan Jaqsylyqov pen Mádına Ábilqasymova qol qoıdy.
Qorǵanys vedomstvosynyń bul bastamasy merzimdi qyzmettegi áskerı qyzmetshilerge áskerı qyzmet ótkerý kezeńinde óz nesıelerin umytýǵa múmkindik beredi.
Nesıeler boıynsha tólemderdi keıinge qaldyrý barlyq banktermen jáne mıkroqarjy uıymdarymen sarbazdardyń barlyq aqshalaı qaryzdaryn toqtata turý kózdeledi.
Memorandýmdy iske asyrý úshin Qorǵanys mınıstrliginiń Agenttikpen jáne qarjy uıymdarymen ózara is-qımylynyń arnaıy algorıtmi ázirlendi. Osyǵan sáıkes, shaqyrý naýqany kezinde bolashaq Otan qorǵaýshylardyń jınalǵan banktik qaryzdary men shaǵyn nesıeleri týraly málimetter birden Qarjy naryǵyn retteý jáne damytý agenttigine jiberiletin bolady.
Osy derekterdiń negizinde kredıtorlar negizgi borysh pen syıaqy boıynsha tólemderdi keıinge qaldyrý jáne bereshekti óndirip alýdyń barlyq nysandaryn toqtata turý máselelerin pysyqtaıdy.
Tólemderdi keıinge qaldyrý kezeńinde kredıtor sotqa berýdi, bereshekti óndirip alý maqsatymen atqarýshylyq jazba jasaý úshin notarıýsqa júginýdi, turǵyn úıdi satýdy, qaryz alýshynyń otbasyn páterden shyǵarýdy toqtata turady. Sondaı-aq sot aktilerine sáıkes kredıtor bereshekti óndirip alýdyń barlyq nysandaryn toqtatýǵa mindetteledi.
Jalpy, memorandým qarjylyq qyzmetterdi tutynýshylardyń zańdy múddelerin ýaqtyly qorǵaýǵa baǵyttalǵan. Ol sondaı-aq áskerı qyzmettiń belgilengen merzimin ótkerý kezeńinde merzimdi qyzmettegi áskerı qyzmetshilerdiń qaryzdary men shaǵyn nesıeleri boıynsha mindettemelerdi oryndaı almaýyna baılanysty týyndaıtyn áleýmettik shıelenisti joıýǵa yqpal etedi.