Astanada Dala dauysy shyǵarmashylyq baıqaýynyń jeńimpazdary marapattaldy. Baıqaý 5 nomınasııa boıynsha 16 syılyqty qamtydy, dep habarlaıdy Egemen.kz.
Jobaǵa qatysý úshin 200-den astam ótinim túsken. Bul qazaqstandyq kompozıtorlar men jazýshylardyń sońǵy úsh jylda jazylǵan jáne buryn kópshilik aldynda oryndalmaǵan týyndylary.
«Baıqaý kópshilikke tyń týyndylar usynyp qana qoımaı, múldem jańa esimder ashty. Jeńimpazdar men laýreattardyń shyǵarmashylyq jumystary halqymyzdyń tarıhy men mádenıetinde mańyzdy iz qaldyryp, qazirgi mádenı landshafttyń bir bóligine aınalatynyna senimdimin. Bul jobany biz jas avtorlardyń ózderin tanytýy jáne memlekettiń qoldaýyna ıe bolý úshin dástúrge aınaldyrǵymyz keledi», dedi Mádenıet jáne sport mınıstri Dáýren Abaev resmı marapattaý rásiminde.
Jeńimpazdar men laýreattardy Qazaqstannyń belgili mádenıet jáne óner qaıratkerlerinen arnaıy qurylǵan qazylar alqasy jabyq túrde anyqtady. Baıqaýdyń ereksheligi – qatysqan avtorlardyń da, olardyń jumysyn saraptaǵan qazylar alqasynyń quramy da sońǵy sátke deıin qupııa boldy.
Respýblıkalyq Dala dauysy baıqaýynyń jeńimpazdary kimder?
«Úzdik klassıkalyq mýzyka» nomınasııasymen jeke aspapqa arnalǵan «Illıýzııa» shyǵarmasy úshin Beıbit Ábiluly Dáldenbaı, ansamblderge arnalǵan «(Re)incarnation [Yerlik]» shyǵarmasy úshin Sanjar Baıterekov, Halyq aspaptary, úrmeli, sımfonııalyq jáne estradalyq-sımfonııalyq orkestrlerine arnalǵan «Skrıpka jáne sımfonııalyq orkestrine arnalǵan konsert» shyǵarmasy úshin Shyryn Bazarqulova marapattaldy.
«Úzdik mýzykalyq-teatrlyq janr týyndysy» nomınasııasy boıynsha «Sáken» operasy úshin kompozıtor Álibı Ábdinurov, lıbretto avtory Qanat Júnisov, «Aldar kóse» baleti úshin kompozıtor Almabek Meıirbekovtyń murageri Erden Ordabekuly, lıbretto avtory Damır Ýrazymbetov, «Alpamys» baleti úshin kompozıtor Arman Jaıym, lıbretto avtory Aıtqalı Jaıymov marapattaldy.
Estrada janryndaǵy «Respýblıka áni» nomınasııasyn «Elim dep soqqan júregim» áni úshin Isa Aýǵantaı aldy. Mátinin jazǵan – Saıat Raqymjan.
«Úzdik folklorlyq mýzyka» nomınasııasyna avtorlyq vokaldyq-aspaptyq týyndy «Bizdiń aýyl tamasha» áni úshin Oral Baıseńgir, avtorlyq vokaldyq nemese vokaldyq-aspaptyq týyndy «Love story» balladasy úshin Sátjan Shamenov, avtorlyq aspaptyq shyǵarma (kúı) «Bes perishte» kúıi úshin Asylbek Kenigesov laıyq dep tanyldy.
«Úzdik dramatýrgııalyq týyndy» nomınasııasyn dramalyq teatrlarǵa arnalǵan tarıhı nemese zamanaýı taqyryptaǵy pesa «Zor Bilgamesh hám Qorqyt Ata» shyǵarmasy úshin Asylbek Ihsanov, balalar men jasóspirimder aýdıtorııasyna arnalǵan pesa «Qashqyn» shyǵarmasy úshin Qýanysh Jıenbaı aldy.
Qazaqstan Respýblıkasy Mádenıet jáne sport mınıstrliginiń 2 arnaıy júldesiniń ıegerleri: Jańabaı О́tegenov «Túrkistan» áni, Ǵalymbek Isimbergenov «Meıirim kerek» áni.