Premer-mınıstr Álıhan Smaıylov óńirdiń áleýmettik-ekonomıkalyq damý barysymen tanysyp, ózekti problemalyq máselelerdi sheshý jáne negizgi ınfraqurylymdyq, ónerkásiptik jáne áleýmettik nysandardy aralaý maqsatynda Qyzylorda oblysyna bardy, dep habarlaıdy Egemen.kz.
Jumys sapary barysynda Álıhan Smaıylov jalpy qýaty 197 myń tonnadan asatyn «Orda Glass Ltd» shyny óndirý zaýytynyń jumysymen tanysty. Kásiporyn bıylǵy qazan aıynda «Qazaqstandyqtardyń ál-aýqatyn arttyrýǵa baǵyttalǵan ornyqty ekonomıkalyq ósý» ulttyq jobasy aıasynda iske qosyldy. Memlekettik qoldaý sharalary retinde oǵan qajetti ınjenerlik ınfraqurylym, avto jáne temirjoldar júrgizildi. Qazirgi ýaqytta zaýytta 370 adam jumys isteıdi. О́nim respýblıkanyń basqa óńirlerine jiberiledi, eksportqa shyǵarý josparda bar.
Premer-mınıstrdiń aıtýynsha, shyny zaýytynyń iske qosylýy Qyzylorda oblysynda ǵana emes, búkil Qazaqstan boıynsha qurylys ındýstrııasynyń damýyna serpin beredi.
«Mundaı óndirister qurylys shyǵyndaryn jáne ımportqa táýeldilikti aıtarlyqtaı tómendetýge múmkindik beredi. Bıyl ónerkásipte 160 jańa joba iske qosyldy. Úkimet óz tarapynan osyndaı kásiporyndarǵa barlyq qajetti kómek kórsetýdi jalǵastyrýǵa daıyn», dedi Álıhan Smaıylov.
Budan ózge Premer-mınıstr qýaty jylyna 33 myń tonnadan asatyn «Maǵjan jáne K» JShS kúrish óńdeý zaýytynda boldy. Kásiporyn zamanaýı joǵary tehnologııalyq qural-jabdyqtarmen jabdyqtalǵan jáne biryńǵaı avtomattandyrylǵan júıe arqyly basqarylady.
Sonymen qatar Úkimet basshysy ishki naryqqa jáne ishinara eksportqa jiberiletin ıodtalǵan tehnıkalyq jáne as tuzyn óndiretin «Assol» zaýytynda boldy. 2021 jyly kompanııa ónimder men qyzmetterdiń sapasy boıynsha Prezıdenttiń «Altyn Sapa» syılyǵynyń jeńimpazy bolyp tanylǵan.
Álıhan Smaıylov Qyzylorda oblysynyń respýblıka boıynsha kúrishtiń negizgi óndirýshisi ekenin (90%) jáne tuz óndirý boıynsha da jetekshi orynda (97%) turǵanyn atap ótti. Bıyl óńirdiń AО́K salasyna quıylǵan ınvestısııalary 8,5%-ǵa ósti, 250 jańa joba iske asyrylyp jatyr. Osy oraıda, Úkimet basshynyń aıtýynsha, elimiz ózin azyq-túlik taýarlarymen tolyq qamtamasyz etýi kerek.
Jumys sapary barysynda Úkimet basshysy óńirdiń aýyl sharýashylyǵy qurylymdarynyń basshylarymen kezdesý ótkizdi. Agrarııler salanyń birqatar máselesin, sonyń ishinde sýarmaly sýmen qamtamasyz etý jáne kúrish ósirýshilerdiń zamanaýı aýyl sharýashylyǵy tehnıkasyna qoljetimdiligin keńeıtý máselelerin atap ótti. Álıhan Smaıylov aýyl sharýashylyǵy taýaryn óndirýshilerdi muqııat tyńdap, AО́K-tiń problemalyq máselelerin sheshý Úkimettiń nazarynda ekenin atap ótti.
«Memleket aýyl sharýashylyǵy salasyna úlken qarjylyq qoldaý kórsetedi. Degenmen óndirýshiler de óz tarapynan halyqqa sapaly jáne qoljetimdi azyq-túlik taýarlaryn usynýy qajet», dedi Premer-mınıstr.