Qazaqstanda balalarǵa arnalǵan ulttyq onkogematologııalyq ortalyq paıda bolady. Bul týraly Densaýlyq saqtaý vıse-mınıstri Vıacheslav Dýdnık habarlady, dep jazady Egemen.kz.
Vıse-mınıstrdiń aıtýynsha, Qazaqstanda 2024 jylǵa deıingi balalarǵa onkogematologııalyq kómekti jetildirý boıynsha jol kartasy bekitilgen.
«Elimizde jylyna orta eseppen onkologııalyq aýrýy bar 500-600 bala anyqtalady. Onyń 41 paıyzy jedel leıkemııamen, 14 paıyzy ortalyq júıke júıesiniń isikterimen, 9 paıyzy jumsaq tinderdiń sarkomalarymen jáne basqa aýrýlarmen aýyrady. 1-2 satydaǵy balalarda onkologııanyń anyqtalýy 38 paıyzdy qurady. Jas qurylymynda 33 paıyzy - 3 pen 10 jas aralyǵyndaǵy balalar. Barlyǵy ártúrli onkologııalyq jáne gematologııalyq aýrýlary bar 3833 bala dınamıkalyq baqylaýǵa alynǵan, onyń ishinde 968 pasıent ambýlatorııalyq jolmen arnaıy patogenetıkalyq terapııa alýdy jalǵastyryp jatyr», dedi Vıacheslav Dýdnık OKQ brıfınginde.
Onyń aıtýynsha, búgingi tańda elimizde dıagnostıka men emdeýdiń joǵary tehnologııalyq zamanaýı ádisteri engizilgen.
Sońǵy bes jyl ishinde 335 balaǵa gemopoetıkalyq diń jasýshalary transplantasııalandy, onyń 49-y bıyl jasaldy.
«Memleket basshysy Qasym-Jomart Toqaevtyń tapsyrmasy boıynsha mınıstrlik onkologııalyq aýrýlarmen kúres boıynsha keshendi jospar ázirledi. 2025 jylǵa deıin balalar onkologııalyq aýrýhanalarynyń materıaldyq-tehnıkalyq bazasyn kúsheıtý, dári-dármekpen qamtamasyz etýdi jaqsartý jáne osy qyzmet mamandarynyń biliktiligin arttyrý boıynsha is-sharalar kózdelgen. Sondaı-aq Qazaqstanda balalarǵa arnalǵan ulttyq onkogematologııalyq ortalyq qurý josparlanýda», dep tolyqtyrdy spıker.