Senattyń Konstıtýsııalyq zańnama, sot júıesi jáne quqyq qorǵaý organdary komıtetiniń depýtattary keńeıtilgen otyrysta «Qazaqstan Respýblıkasynyń keıbir zańnamalyq aktilerine sybaılas jemqorlyqqa qarsy is-qımyl jáne memlekettik qorǵaýǵa jatatyn adamdardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» zań jobasyn talqylady, dep habarlaıdy Egemen.kz.
Qujattyń maqsaty - sybaılas jemqorlyqqa qarsy is-qımyl týraly zańnamany odan ári jetildirý jáne sybaılas jemqorlyqqa qarsy kúrestiń tıimdi júıesin qalyptastyrý. Zań jobasy Qazaqstan Respýblıkasynyń 3 kodeksine jáne 8 zańyna ózgerister men tolyqtyrýlar engizýdi kózdeıdi.
Zań jobasymen memlekettik fýnksııalardy oryndaýǵa ýákilettik berilgen adamdardyń, olarǵa teńestirilgen adamdardyń, sondaı-aq «Sybaılas jemqorlyqqa qarsy is-qımyl týraly» Qazaqstan Respýblıkasynyń zańynda kózdelgen ózge de adamdardyń shyǵystary men kiristeriniń mólsherles bolýyn baqylaý, sybaılas jemqorlyq qylmystarynyń tizbesin keńeıtý máseleleri, sondaı-aq sybaılas jemqorlyqqa qarsy is-qımylǵa járdemdesken memlekettik qorǵaýǵa jatatyn adamdarǵa qatysty qaýipsizdik sharalary retteledi.
Zań jobasy qabyldanǵanda memlekettiń sybaılas jemqorlyqqa qarsy júrgizip jatqan saıasatyna halyqtyń senim deńgeıin arttyrýǵa, elimizdiń áleýmettik-ekonomıkalyq damýyndaǵy jaǵymsyz kórinis bolyp otyrǵan sybaılas jemqorlyqty azaıtýǵa, sondaı-aq qoǵamda sybaılas jemqorlyqqa tózbeýshilik ahýalyn qalyptastyrýǵa múmkindik beredi.
Depýtattar komıtettiń keńeıtilgen otyrysynyń qorytyndysy boıynsha zań jobasyn Palatanyń qaraýyna jiberý týraly sheshim qabyldady.