Prezıdent Qasym-Jomart Toqaev jyl basynan qyzmetin bastaǵan Konstıtýsııalyq Sottyń jańa ákimshilik ǵımaratyna baryp, taǵaıyndalǵan sýdıalarmen kezdesti, dep habarlaıdy Egemen.kz Aqordanyń baspasóz qyzmetine silteme jasap.
Memleket basshysy Konstıtýsııalyq Sot el ómirinde aıryqsha ról atqaratyn organ ekenin atap ótip, buǵan deıin 27 jyl boıy tabysty jumys istegen Konstıtýsııalyq Keńes múshelerine jáne onda ár kezeńde eńbek etken qyzmetkerlerge alǵys aıtty.
– Búginde Qazaqstan jańa dáýirge qadam basty, buryn-sońdy bolmaǵan biregeı saıası reformalar júzege asyryldy. Qazirgi tańda dúnıejúzinde dál osyndaı aýqymdy, mazmundy reformalar jasap jatqan el biren-saran. Bul – aqıqat. Muny búkil álem moıyndap otyr. Qazaqstan reformator memleketke aınaldy. Jalpy, elimizde kóptegen ózgeris bolyp jatyr. Azamattardyń konstıtýsııalyq quqyǵyn qorǵaýǵa basa mán berilip otyr. Bul jumysqa qoǵam ókilderi belsene qatysýǵa yntaly. Sondyqtan men Konstıtýsııalyq Sot qurý týraly bastama kóterdim. Azamattarymyz jalpyhalyqtyq referendýmda osy jáne basqa da usynystarǵa qoldaý bildirdi, – dedi Prezıdent.
Memleket basshysy Konstıtýsııalyq Sot barlyq zańdar men zańǵa sáıkes aktilerdiń Konstıtýsııaǵa sáıkestigin qamtamasyz etýge tıis ekenine toqtaldy.
– Shyn máninde, Konstıtýsııalyq Sot – elimiz úshin óte mańyzdy ınstıtýt. Endi azamattarymyz Konstıtýsııaǵa qaıshy keletin normalardy zańsyz dep taný úshin Konstıtýsııalyq sotqa tikeleı ózderi shaǵymdana alady. Sonymen qatar Bas prokýror jáne Adam quqyqtary jónindegi ýákil de Konstıtýsııalyq Sotqa júginýge quqyǵy bar. Jalpy, Prokýratýra, Sot, quqyq qorǵaý organdarynyń jumysyna qoıylatyn talap aıtarlyqtaı kúsheıedi. Konstıtýsııalyq Sot depýtattardyń jáne Úkimettiń zań shyǵarý jumysyna oń yqpal etedi. Bir sózben aıtqanda, Konstıtýsııalyq Sot adam quqyqtaryn qorǵaý júıesiniń basty tiregine aınalady, – dedi Qasym-Jomart Toqaev.
Memleket basshysy qoǵam Konstıtýsııalyq Sottyń qyzmetinen oń ózgerister kútip otyrǵanyn, qazylardyń óz mindetin adal atqarýy halyqtyń, BAQ pen halyqaralyq qurylymdardyń jiti nazarynda bolatynyn eske saldy.
– Qazylardyń osy quramy memlekettik mańyzy zor mindetterin tabysty atqaryp, qoǵam men azamattardyń úmitin aqtaıdy dep sanaımyn. Konstıtýsııalyq Sot quramyna belgili quqyqtanýshy ǵalymdar men túrli salada kóp jyldyq tájirıbesi bar zańgerler kirdi. Nátıjesinde teorııa men tájirıbe ushtasty. Konstıtýsııalyq Sot tóraǵasy Elvıra Azımova uzaq ýaqyt boıy ádilet organynda qyzmet etti, adam quqyǵyn qorǵaý máselelerimen aınalysty, sondaı-aq halyqaralyq arenada memleket múddesin qorǵady. Onyń bul tájirıbesi jańa salada zor paıdasyn tıgizedi. Konstıtýsııalyq Sot qyzmetiniń normatıvtik bazasy men erejelerin ázirleý boıynsha aýqymdy jumys atqaryldy. Endi Konstıtýsııalyq Sottyń qyzmeti barysynda qajettigine qaraı bul bazany jetildirý kerek bolatyn shyǵar. Jalpy, jańadan qurylǵan ınstıtýt el aýmaǵynda Ata zańnyń ústemdigin qamtamasyz etýi úshin barlyq jaǵdaı jasaldy, – dedi Prezıdent.
Memleket basshysynyń aıtýynsha, zań ústemdigi qaǵıdatynyń myzǵymastyǵy elimizdegi saıası reformalardyń ózegi sanalady. Júrgizilip jatqan reformalardyń sany jaǵynan, eń bastysy, mazmuny men sapasy turǵysynan Qazaqstan álemde kóshbasshy elderdiń qataryna kiretini sózsiz.
– Shyn máninde, tek byltyr atqarylǵan jumystar bizdiń qoǵamdaǵy ózgeristerdiń aýqymy men tereńdigi týraly oń áser qaldyrmaýy múmkin emes. Qazaqstan memleket retinde aıtarlyqtaı jańǵyrdy. Bul derekti álemdik qoǵamdastyq ashyq moıyndady. Oǵan kóptegen halyqaralyq baılanys pen eń joǵary deńgeıdegi kezdesýler dálel. Konstıtýsııalyq Sot Ádiletti Qazaqstannyń aınasy bolady desek, artyq aıtqandyq emes, – dedi Qasym-Jomart Toqaev.
Memleket basshysy Jańa, Ádiletti Qazaqstannyń basty qaǵıdaty – ádildik ekenine nazar aýdaryp, qazylardyń osy mańyzdy mindetti abyroımen atqaratynyna senim bildirdi.
– Halqymyz qara qyldy qaq jarǵan qazylarǵa erekshe qurmetpen, syılastyqpen qaraıdy, «týra bıde týǵan joq» dep sýdıalarǵa zor úmit artady. Árbir sheshim Ata zańǵa sáıkes qabyldanýǵa tıis. О́ıtkeni bul, eń aldymen, elimizdiń taǵdyryna yqpal etetin sheshimder bolmaq, – dedi Prezıdent.
О́z kezeginde Konstıtýsııalyq Sot Tóraǵasy Elvıra Azımova Memleket basshysyna jańa organ qyzmetiniń negizgi baǵyttary men mindetteri týraly baıandady. Sondaı-aq Konstıtýsııalyq sot qoǵam suranysy jáne memleket qajettiligin óteý úshin aıanbaı eńbek etetinine senim bildirdi.