Prezıdent Indýstrııa jáne ınfraqurylymdyq damý mınıstri Marat Qarabaevty, Ekologııa jáne tabıǵı resýrstar mınıstri Zúlfııa Súleımenovany, Mádenıet jáne sport mınıstri Ashat Oralovty, Oqý-aǵartý mınıstri Ǵanı Beısembaevty jáne Ádilet mınıstri Azamat Esqaraevty qabyldady, dep habarlaıdy Egemen.kz Aqordanyń baspasóz qyzmetine silteme jasap.
Kezdesý barysynda Qasym-Jomart Toqaev mınıstrlikterdiń jaýapkershiligindegi memlekettik jáne salalyq baǵdarlamalardy, ulttyq jobalardy tıimdi júzege asyrýdyń mańyzdylyǵyna nazar aýdardy.
Memleket basshysy Indýstrııa jáne ınfraqurylymdyq damý mınıstri Marat Qarabaevqa geologııa jáne jer qoınaýyn paıdalaný salasyn retteý, kólik-logıstıka áleýeti men óńdeý ónerkásibin damytý, sondaı-aq turǵyn úı qurylysynyń kólemin arttyrý jumystaryn tapsyrdy.
Ekologııa jáne tabıǵı resýrstar mınıstri Zúlfııa Súleımenovaǵa sý máselesiniń saıasaty men tabıǵı resýrstardy retteý, kógaldandyrý jáne azamattardy ekologııalyq turǵyda tárbıeleý mindetteri júkteldi.
Mádenıet jáne sport mınıstri Ashat Oralovqa týrızmdi, buqaralyq sportty jáne mádenıet salasyn damytý jóninde birqatar tapsyrma berildi.
Prezıdent Oqý-aǵartý mınıstri Ǵanı Beısembaevqa «Jaıly mektep» ulttyq jobasynyń ýaqytyly júzege asyrylýyn qamtamasyz etý, sondaı-aq mekteptegi jáne mektepke deıingi bilim berý sapasyn arttyrý jóninde tapsyrma berdi.
Ádilet mınıstri Azamat Esqaraevqa zańnamany jáne normatıvtik-quqyqtyq bazany odan ári jetildirý jóninde birqatar mindet júkteldi.
Kezdesý sońynda Qasym-Jomart Toqaev azamattarmen tyǵyz jumys istep, olardyń máselelerin ýaqtyly sheshý qajet ekenin atap ótti.