Elimizdegi sońǵy kadrlyq ózgerister ıaǵnı, joǵary memlekettik laýazymdarǵa jastardyń taǵaıyndalýy áleýmettik jelilerde qyzý talqylanyp jatyr. Osyǵan qatysty Memlekettik keńesshi Erlan Qarın «Telegram» kanalynda jazba qaldyryp, pikirin bildirdi.
Erlan Qarınniń málimdeýinshe, jańadan taǵaıyndalǵan mınıstrler – Mádenıet jáne sport mınıstri Ashat Oralov pen Ekologııa jáne tabıǵı resýrstar mınıstri Zúlfııa Súleımenova Prezıdenttik jastar kadrlyq rezerviniń (PJKR) quramyna engen. «Bul joba Memleket basshysy Qasym-Jomart Toqaevtyń bastamasymen 2019 jyly qolǵa alynǵan edi. Búgingi tańda Úkimettiń úsh múshesi Prezıdenttik jastar kadrlyq rezerviniń ókili. Búginge deıin 350 rezervısttiń 258-i túrli jaýapty laýazymdarǵa taǵaıyndaldy, onyń 34-i «A» korpýsynyń memlekettik saıası jáne memlekettik qyzmetshileri (apparat basshylary, komıtet tóraǵalary)», dep Memlekettik keńesshi kadrlyq rezervtiń quramyn jiktep berdi.
Sonymen qatar Erlan Qarın jas mamandardy basshylyq qyzmetke kóterý boıynsha júıeli jumys jalǵasyp jatqandyǵyn atap ótti. «Prezıdenttik jastar kadrlyq rezervi jobasyn odan ári iske asyrý – prezıdenttik saılaý baǵdarlamasynyń basym baǵyttarynyń biri», dep qosty E.Qarın.