Senatorlar Úkimetti múmkindigi shekteýli mektep oqýshylarynyń máselelerin jedel sheshýge shaqyrdy, dep habarlaıdy Egemen.kz Parlament Senatynyń baspasóz qzymetine silteme jasap.
Senat depýtattary Nurtóre Júsip, Sultanbek Mákejanov, Baqytjan Jumaǵulov, Dınar Nóketaeva jáne Lázzat Qaltaeva «Nıkolaı Ostrovskıı atyndaǵy zaǵıp jáne nashar kóretin balalarǵa arnalǵan №4 arnaıy mektep-ınternatynda» boldy.
Muǵalimder ózderiniń negizgi mindeti – kórý qabileti nashar balalardy oqytý jáne tárbıeleý ekenin senatorlarǵa aıtyp berdi. Ol úshin ortalyq júıke júıesiniń syrqaty men basqa da aýrýlarǵa baılanysty damýdaǵy qaıtalama aýytqýdy jeńýge jáne júrýdi qalypqa keltirýge baǵyttalǵan túzetý-tárbıe jáne emdeý-qalpyna keltirý jumystary júrgizilip otyr.
«Múmkindigi shekteýli jandardy qoldaý asa mańyzdy. Memleket jeke-dara bilim berý, kedergisiz orta qurý, ınfraqurylymdyq qoljetimdilikti qamtamasyz etý, osyndaı tulǵalar úshin jumysqa ornalasý múmkindikterin keńeıtý máselelerine kóp kóńil bóle bastady», dep atap ótti Lázzat Qaltaeva.
Kezdesý barysynda oqýshylardyń oqýy men demalýyna arnalǵan úı-jaılardyń jetispeýi men ekskýrsııaǵa qolaıly jaǵdaı jasaý qajettigi týraly máseleleri de talqylandy.
«Biz múmkindigi shekteýli jandardyń qajettikterin qanaǵattandyrý úshin barlyq jaǵdaıdy jasaýymyz kerek. Bul neǵurlym júıeli, dáıekti jumysty talap etedi. Úkimet pen ákimder erekshe qajettilikti talap etetin adamdardyń tynys-tirshiligin uıymdastyrýǵa kásiporyndardyń qatysýyn memlekettik yntalandyrý normalaryn qarastyrýy kerek», dedi Sultanbek Mákejanov.
Depýtattar Naýryzbaı aýdanyndaǵy oqýshylarǵa arnalǵan ınnovasııalyq shyǵarmashylyq ortalyǵy men balabaqsha qurylysynyń jaǵdaıymen tanysty.
«Barlyq usynystar men eskertýler Senat depýtattarynyń nazaryna alynady jáne tıisti memlekettik qurylymdarmen talqylanatyn bolady», dedi senator Nurtóre Júsip.