Arqalyq qalasynda bes qabatty turǵyn úıdiń eń joǵary qabatynan qulap ketken qyzdy patrýldik polısııa qyzmetkeri qutqaryp qaldy. Besinshi qabattan qulap kele jatqan qyzdy qaǵyp almaq bolyp, qushaq jaıyp, keýdesin tósegen polıseı aıaǵy zaqymdanyp, birneshe jerinen jaraqat alǵan. Al bıikten quldılaǵan qalpy tártip saqshysynyń ústine qulaǵan qyz aman-esen.
Sýyt habar qalalyq polısııa basqarmasynyń jedel basqarý ortalyǵyna jetinshi qańtar kúni tańǵy saǵat 05:30-da kelip túsken. Oqıǵa bolǵan úıdiń tusynan ótip bara jatqan turǵyndardyń biri beıtanys qyzdyń besinshi qabattan qulap bara jatyp, balkonnyń temir qorshaýynan ustap úlgergenin habarlaıdy.
Osylaısha, oqıǵa ornyna patrýldik polısııa qyzmetkerleri Almat Ámirhan men Rýslan Qapsamatov shuǵyl jetedi. Almat Ámirhan syrtta qalyp, áriptesi dereý besinshi qabatqa qaraı júgire jóneledi. Bar oıy – jedel qımyldap balkonǵa ilinip turǵan qyzdy qutqaryp qalý.
Alaıda qary talyp, názik saýsaqtary jazyla bergen qyz dál osy sátte jerge qaraı quldılaı jónelgen. Tómennen kóz jazbaı qarap turǵan Almat Ámirhan qulap kele jatqan qyzdy qapsyra qushaqtap, ustap qalmaqqa umtylady. Alaıda 10-11 metrlik bıikten qulaǵan adamdy qaǵyp alý ońaı ma, ajalǵa qarsy tósin tósegen polıseı qyzdy qushaqtaı jerge qulaıdy. Rýslan 29 jastaǵy qala turǵynyn ajaldan osylaı arashalap qaldy.
Joǵary qabattan qulaǵan qyzdyń on eki múshesi saý, esh jeri zaqymdanbaǵan. Al birneshe jerden jaraqat alǵan patrýldik polısııa qyzmetkeri Almat Ámirhanǵa dárigerler kómek kórsetti.
Qostanaı oblysy