Túrkistan oblysyndaǵy ózekti máselelerdiń biri – jumys oryndarynyń joqtyǵy, halyq tabysynyń tómendigi. Ulttyq statıstıka bıýrosy málim etkendeı, 2022 jyldyń birinshi toqsanynda óńirde jumyssyzdyqtyń eń joǵary deńgeıi tirkeldi - 5,2%. Bul respýblıkalyq kórsetkishten 0,3 paıyzǵa artyq, dep habarlaıdy Egemen.kz.
Jergilikti bılik bar kúsh-jigerin jeke kásipkerlikti qoldaýǵa, ınvestısııa tartýǵa, jańa aýqymdy óndiristerge qolaıly jaǵdaı jasaýǵa baǵyttap otyr.
Máselen, Túlkibas aýdanyndaǵy óńirdegi «Sastóbe ınnovasııalyq kesheni» JShS-niń ınjenerlik júıesiniń qurylysy 1000-nan astam adamdy jumyspen qamtyp otyr. Zaýytta sýmen, gazben, elektrmen qamtý boıynsha ınjenerlik jumystar júrgizilip jatyr. Qurylys barysyn Túrkistan oblysy ákiminiń ózi aralap kórdi.
Aıta ketsek, kásiporyn jeke ınvestordyń qarajatyna salynyp jatyr. Darhan Satybaldy jobany qoldap, otandyq ónim túrlerin kóbeıtýdi tapsyrdy.
Daıyn shıkizatty qaıta óńdeý jáne daıyn ónim shyǵarý boıynsha óndiristi damytý máselesi de mańyzdy ekenin atap ótti. Aımaq basshysy sol mańnan ındýstrııalyq aımaq salý máselesine toqtala ketti.
Joba 2024 jyldyń maýsym aıynda aıaqtalady dep josparlanyp otyr. Zaýyt iske qosylǵannan keıin jylyna 100 myń tonna kúıdirgish soda, 120 myń tonna polıvınılhlorıd (PVH) jáne 1 mıllıon tonna sement óndiriledi. Jobanyń jalpy quny 122 mıllıard 850 mıllıon teńgeni quraıdy.
О́ńir basshysy Túlkibas aýdanyndaǵy «Qas-Beton» JShS jumysymen de tanysty. 2008 jyly iske qosylǵan zaýytta 200-den astam adam jumys isteıdi. Munda áktas óndiriledi.
Darhan Satybaldy aýdan ákimine ınvestorlarmen jumysty kúsheıtip, óndiris kólemin arttyrýdy mindettedi. Ol kásipkerlikti damytýdyń ınfraqurylymyn qurýdy basty nazarda ustaý kerektigin atap ótti. Ákimniń aıtýynsha, bul másele oblys tarapynan árqashan qoldaý tabady.
Budan bólek ákim Saıram aýdanynda bolyp, jergilikti turǵyndarmen kásipkerlikti damytý jóninde pikir almasty.
«Biz ortalyqtan túsetin bıýdjet qarajatyna emes, kásipkerlik pen zaýyttardan túsetin tabysqa senýimiz kerek. Búginde ónerkásipterdi qurýǵa basymdyq beriledi. Halyqty kásipkerlikke tartý, jańa kásiporyndar ashý máselesin nazarda ustaý asa mańyzdy. Bul basshylar jumysynyń basty kórsetkishteriniń biri bolmaq», dedi ol.