Bestóbe kenishiniń jumys istemeıtin shahtasynyń aýmaǵynda zańsyz altyn izdeýshiniń máıiti tabyldy. Bul týraly shahtanyń kezekshi qyzmetkeri polısııaǵa habarlaǵan. Onyń qasynda birge zańsyz altyn izdegen adamdar máıitti syrtqa kótergen, dep habarlaıdy Egemen.kz.
2022 jyly osy kenishten 940-tan astam zańsyz altyn izdeýshi ustalyp polısııaǵa tapsyrylǵan bolatyn.
Marqumnyń 1982 jyly týǵan О́zbekstan Respýblıkasynyń azamaty ekeni anyqtaldy.
Sondaı-aq oqıǵa kýágeri retinde Qaraǵandy oblysynyń Jańaarqa aýdanynyń turǵyny, 1991 jyly týǵan er adam anyqtaldy, ol shahtada eki apta bolǵanyn málimdedi. Ol «kondeıka» (kenshilerdiń demalys bólmesi) mańynan qımylsyz jatqan er adamnyń máıitin tapqan. Máıittiń janynda tastar jatqan. Onyń aıtýynsha, qaıtys bolǵan adam 18 kún boıy shahtada bolǵan.
Keıin jaqyn mańdaǵy Bestóbe aýylynyń turǵyny, 1994 jyly týǵan sybaılasymen birge ol máıitti qapqa salyp, «Sentralnaıa» shahtasynyń 475-shi deńgeıinen jer betine shyǵarady, aqyrynda máıit sol jerden tabyldy. Osy oqıǵa boıynsha qylmystyq is qozǵaldy.
Osyǵan deıin de «Altynalmas AK» AQ kompanııasy Bestóbe kenishiniń shahtasynda quramynda altyn bar kendi zańsyz óndirý oqıǵalary bar ekendigi týraly birneshe ret eskertken bolatyn.
Búgingi tańda shahtadaǵy jumystar toqtatylǵan: elektrondyq jáne telefon baılanysy ajyratyldy, shahtalardyń oqpandary jabyldy, joldardyń lıýkteri biteldi, esikter mórlenip kúzetke tapsyryldy, jeldetý jumys istemeıdi, kótergish qondyrǵylary jumys istemeıdi, kótergish qondyrǵylardy shuǵyl iske qosý múmkin emes. Sonymen qatar kenishti jer asty sýlary basyp jatyr.
Qaýipti jaǵdaılarǵa, birneshe ret eskertýlerge, turaqty sýyq aýa raıyna qaramastan zańsyz altyn izdeýshiler ómirlerin qaterge tigip, shahtaǵa túsýlerin qoımaı otyr. Kompanııa shahtaǵa zańsyz túsýden bas tartýǵa, al shahtadaǵy altyn izdeýshilerdi shuǵyl túrde ony tastap ketýge shaqyrady.