18 qańtarda telearnalar men radıostansııalardyń habar taratýy ýaqytsha toqtatylady, dep habarlaıdy Egemen.kz «Qazteleradıo» ulttyq operatorynyń baspasóz qyzmetine silteme jasap.
«18 qańtar kúni saǵat 03:00 men 17:00 aralyǵynda jerseriktik, sıfrlyq jáne analogty efırlik jelilerdiń tehnıkalyq quraldaryndaǵy servıster jabylyp, josparly-profılaktıkalyq jumystar júrgiziledi. Osyǵan baılanysty, ıaǵnı jumystar júrgizilgen kezde Qazaqstannyń barlyq aýmaǵynda teleradıoarnalardy retranslıasııalaý ýaqytsha toqtatylady», dep jazylǵan habarlamada.
Vedomstvonyń habarlaýynsha, «Qazteleradıo» AQ toqsan saıyn jerseriktik jáne efırlik jelilerdiń tehnıkalyq quraldarynda servısterdi jaba otyryp, josparly-profılaktıkalyq jumystar júrgizedi. Bul jumystar teleradıo habarlaryn sapaly taratýdy qamtamasyz etý úshin qajet, al toqsan saıynǵy josparly-profılaktıkalyq jumystar servısti uzaq ýaqyt óshirýge múmkindik beredi, sondyqtan osy ýaqyt ishinde tehnıkalyq quraldardy jańǵyrtý boıynsha qosymsha jumystar da júzege asyrylady.