Túrkistan oblysynda zańsyz ańshylyqpen aınalysqan kúdiktilerden qarý-jaraq tárkilendi, dep habarlaıdy Egemen.kz Polisia.kz-ke silteme jasap.
Bul týraly Túrkistan oblysy Polısııa departamenti bastyǵynyń orynbasary Qurmanbek Sahov málimdedi.– Bizdiń Túrkistan oblysy PD ekstremızmge qarsy is-qımyl basqarmasynyń qyzmetkerleri UQK departamentimen birlesip, arnaıy jedel-izdestirý is-sharalaryn júrgizdi. Nátıjesinde Qyzyl kitapqa engizilgen jabaıy janýarlardy zańsyz aýlaý deregin anyqtady. Bul jaıtty QR QK-niń 339-baby 1-bóligi (О́simdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý) boıynsha tirkedik, – dedi ol. Jedel ýákildermen der kezinde qabyldanǵan sharalardyń nátıjesinde Sozaq aýdanynyń turǵyndary anyqtaldy, – dedi Q. Sahov.
Olardyń biri arnaıy esepte turady. Polısııa qyzmetkerleri kúdikke ilingen er adamdardyń úıin tintý kezinde Qazaqstan Qyzyl kitabyna engizilgen arqar janýaryna uqsas ańnyń eti, múıizi men basyn tapty.– Sondaı-aq kúdiktilerden eki tirkelmegen atys qarýy (karabın jáne ańshylyq myltyq), ártúrli kalıbrli 50-den astam patron, qarý-jaraq optıkasy, kisender, qoldan jasalǵan pyshaq, esirtkige uqsas zattar men dinı ádebıetterdi tárkiledik. Alynǵan zattaı dáleldemelerdi tıisti saraptamaǵa jiberdik. Qazirgi ýaqytta osy jaıt boıynsha sotqa deıingi tergeý amaldary júrgizilip jatyr. Kúdiktiler qamaýda. Oqıǵanyń mán-jaıyn anyqtap jatyrmyz, – dep tolyqtyrdy spıker.