Qazaqstandyqtar jer silkinisinen zardap shekken Túrkııa úshin úsh mıllıon dollarǵa jýyq qarjy jınady, dep habarlaıdy Egemen.kz.
«Qazaqstanda sońǵy 3 kúnde jer silkinisinen zardap shekkenderge kómek kórsetý úshin jınalǵan 1 mıllıon 28 myń 706 dollar kólemindegi qarajat AFAD-tyń resmı shotyna aýdaryldy. Osylaısha qaıyrymdylyqtyń jalpy somasy 2 mıllıon 849 myń 836 dollardy qurady», delingen Astanadaǵy Túrkııa elshiliginiń habarlamasynda.
Eske salaıyq, 6 aqpanda Túrkııanyń ońtústik-shyǵys bóliginde eki kúshti jer silkinisi boldy, sonymen qatar Sırııanyń birneshe provınsııasy zardap shekken.
Qaza tapqandar sany qazirdiń ózinde 33 myńnan asty. Qutqarý jumystary jalǵasyp jatyr. BUU málimetinshe, qurbandar sany 50 myń adamnan asýy múmkin. QR Tótenshe jaǵdaılar mınıstrliginiń qutqarýshylary 7 aqpanda jer silkinisi saldaryn joıý úshin Almatydan Túrkııaǵa ushyp ketti.
Jer silkinisi elge 70 mıllıard dollardan astam shyǵyn ákeldi. Sondaı-aq jumys kúshiniń joǵalýy túrik ekonomıkasyna úsh mıllıard dollar shyǵyn ákeledi.