О́ńirde kóktemgi tasqynnyń aldyn alý sharalary barynsha qadaǵalanyp, eldi mekenderge belsendi monıtorıng júrgizilip jatyr. Osy baǵyttaǵy jumystyń nátıjesinde Glýbokoe aýdanynda sý basý qaýpi joǵary 15 aýyl anyqtaldy.
ShQO Tótenshe jaǵdaılar departamenti baspasóz qyzmetiniń málimetine súıensek, qutqarýshylar men Glýbokoe aýdanynyń ákimdigi sý tasqyny qaýpi bar eldi mekenderge monıtorıng júrgizdi. Aýdanda búgingi tańda tońnyń qalyndyǵy – 48 sm, qar jamylǵysynyń bıiktigi – 134 sm.
Glýbokoe aýdanynda sý basý qaýpi joǵary 15 eldi meken bar. Atap aıtqanda, Praporshıkovo, Ývarovo, Glýbokoe, Kamennyı karer, Beloýsovka, Novo-Ýlbınka, Tarhanka, Altaı, Progress, Predgornoe, Razezd, Cheremshanka, Ýshanovo, Maloýbınka jáne Opytnoe pole aýyldary. Ondaǵy barlyǵy 92 úıde 2 335 adam turady.
«Qazirgi kezde sý tasqyny kezeńine daıyndyq jumystary júrgizilip jatyr. Aýdanda 6,6 myń tekshe metr qar shyǵarylǵan. Avtokólik joldaryndaǵy 34 sý ótkizý qurylysy, 14 shaqyrym kanaldar jáne 22,3 shaqyrym aryqtar qar men muzdan tazartyldy. 9 200 dana qap, 100 tonna ınertti materıal, 1,6 tonna janar-jaǵarmaı daıyndaldy. Sondaı-aq tótenshe jaǵdaı bolyp jatsa, halyqty evakýasııalaý úshin ýaqytsha ornalastyrý pýnktterin uıymdastyrdyq. Gıdrologııalyq jaǵdaı turaqty», deıdi Glýbokoe aýdanynyń ákimi Eldar Týmashınov.
Qutqarýshylar árbir úıdi aralap, sý basý qaýpi tóngen jaǵdaıda qalaı áreket etý kerek ekenin túsindirip júr. Bul rette osyǵan deıin ShQO-daǵy 13 jol ýchaskesin sý basý qaýpi bar ekeni habarlanǵanyn aıta ketken jón.
Shyǵys Qazaqstan oblysy