Jyl saıyn aqpan aıynyń ortasynda «Altyn-Emel» ulttyq parkinde Qyzyl kitapqa engen tuıaqtylarǵa sanaq jumystary júrgiziledi, dep habarlaıdy Egemen.kz.
Bıylǵy sanaqqa komıtet tóraǵasy N.N.Qylyshbaev, tóraǵa orynbasary D.Ǵ.Turǵambaev, sonymen qatar Jetisý oblysy aýmaqtyq ınspeksııasy, «Ohotzooprom» О́B» RMQK, «Zoologııa ınstıtýty» ókilderi qatysty. Qaraquıryq, qulan jáne arqardy sanaý úshin keminde eki kún ketedi. Atalǵan jumystar tańnyń atysymen jabaıy ańdar jaıylymǵa shyqqannan bastalady. Ańdardy sanaý atpen jáne avtokólikpen júrgiziledi.
«Altyn-emel» ulttyq tabıǵı parki aýmaǵyna 1982 jyly Barsakelmes aralynan ákelingen 27 Túrkimen qulany Jetisý óńirine jatsynbaı jersinip, búginde olardyń sany 3500-den asqan. Sanaq nátıjesi boıynsha qaraquıryq sany 5360, al arqar sany 179 basty qurady. Byltyrmen salystyrǵanda tuıaqtylardyń ósimi baıqalady.
Aıta ketsek, mundaı sanaq barysynda 20%-dyq aýytqýshylyq bolýy múmkin. Búginde ulttyq park qyzmetkerleri sany kóbeıgen Túrkimen qulanyn, basqa da erekshe qorǵalatyn tabıǵı aýmaq terrıtorııalaryna jiberip, jersindirýdi qolǵa alǵan. Máselen, byltyr «Ile-Balqash» rezervaty aýmaǵyna 60 bas, «Altyn dala» qoryǵyna 4 bas qulan jiberilgen. Atalǵan EQTA aýmaqtaryna jalpy sany 240 qulandy jersindirý josparda bar.