Atyraý oblysy Jańatalap aýylynda ótken qusbegilikten eresekter arasynda XVI Qazaqstan Respýblıkasynyń chempıonaty óz máresine jetti, dep habarlaıdy Egemen.kz.
Eń úzdik kórsetkishterge ıe bolǵan jeńimpazdar arnaıy júldelermen marapattaldy. Chempıonat Mádenıet jáne sport mınıstrligi, Ulttyq sport qaýymdastyǵy, respýblıkalyq «Qusbegilik» federasııasy men Atyraý oblystyq ákimdiginiń uıymdastyrýymen ótken.
Eresekter arasynda «Qusbegilik» ulttyq sport túrinen Qazaqstan Respýblıkasynyń XVI chempıonatynda búrkitshiler saıysy boıynsha «Qarasholaq» qusyn baptaǵan Kúntýǵan Armanbek jeńimpaz atandy. Ekinshi orynda Abaı oblysynan kelgen Baıqadamov Erzat, al úshinshi orynda Kúntýǵan Serikbek (Astana qalasy) pen Qoshqarov Arman (Atyraý oblysy) turaqtady.
Qarshyǵany qolǵa shaqyrýdan Túrkistan oblysynyń ókili Arshabaı Dáýren bas júldeni ıelendi. Júldeli ekinshi orynǵa Keýenov Baǵdat ıe bolsa, úshinshi oryndy elordalyq Kúntýǵan Serikbek pen Raýıluly Qudaıbergen ózara bólisti.
Al ıtelgi salýdan Aqmola oblysynan kelgen Kenjetaev Erlanǵa teń keler qusbegi bolǵan joq. Júldeli ekinshi orynda Jambyl oblysynyń namysyn qorǵaǵan Babajan Baqdáýlet, al úshinshi orynda Túrkistan oblysyn bastaǵan Bazarbaev Ibragım men Keýenov Baǵdat turaqtady.
Osylaısha, komandalyq esepte Túrkistan oblysynyń qusbegileri 1 altyn, 1 kúmis, 2 qola júlde qanjyǵylap, kósh bastady. Astana qalasy jáne Aqmola oblysynyń ókilderi ekinshi jáne úshinshi oryndarǵa jaıǵasty.
Chempıonattyń alǵashqy kúni «Qolǵa qondyrý» saıysynyń qorytyndysy boıynsha 18 búrkit kelesi aınalymǵa ótken bolatyn. Qatysýshylardyń aıtýynsha, qustardyń kórsetken nátıjelerine óńirde oryn alǵan aýa raıy da óz áserin tıgizgen. Aıta ketsek, chempıonattyń erejesine sáıkes tikeleı ıesiniń qolyna qonǵan búrkit qana maksımaldy 10 upaıdy enshileıdi. Osy rette aýa raıynyń qolaısyzdyǵyn eskere otyryp, qazylar alqasynyń sheshimi boıynsha 9 upaıdy enshilegen qatysýshylar da kelesi aınalymǵa ótti. Al «Shyrǵaǵa salý» saıysynda 18 búrkit ekinshi kezeńge ótti. Atap aıtqanda, Aqmola, Almaty, Jambyl, Abaı, Qaraǵandy, Atyraý oblystary men Astana qalasynyń sportshylary jartylaı fınalǵa joldama aldy. Jarystyń ekinshi kúni qustar «Qoıanǵa salý» saıysynda básekege tústi.
Eske salsaq, jarysqa elimizdiń 14 oblysynan 50-ge jýyq sportshy qatysyp, chempıonattyń reglamenti boıynsha 31 búrkit, 11 qarshyǵa, 10 ıtelgi básekege tústi. Chempıonatqa qatysýǵa Almaty, Aqmola, Qaraǵandy, Jambyl, Shyǵys Qazaqstan, Túrkistan, Mańǵystaý, Pavlodar, Atyraý, Abaı, Jetisý, Ulytaý oblystarynyń, sondaı-aq Astana qalasynyń sportshylary nıet bildirgen.