Salyq saıasaty aıqyndalady

Atap aıtqanda, «Salyq jáne bıýdjetke tólenetin basqa da mindetti tólem­der týraly» Qazaq­stan Respýblıka­sy­nyń Kodeksi­ne (Salyq kodeksi) jáne «Salyq jáne bıýdjetke tóle­netin basqa da mindetti tólem­der týraly» Qazaqstan Respýb­lıkasynyń Kodeksin (Salyq kodeksi) qoldanysqa engizý týraly» Qazaqstan Respýb­lıka­synyń Zańyna ózgerister men tolyqtyrýlar engizý týraly» zań jobasy ekinshi oqylymda qaraldy. Palata depýtattary zań jobasynyń jańashyldyqtaryn negizinen qoldaı otyryp, onyń jekelegen erejelerine birqatar tolyqtyrý engizýdi usyndy. Osylaısha, qujat jańa redaksııada qabyldandy.

Máselen, zań jobasy jónin­de baıan­dama jasaǵan senator Bekbolat Orynbekovtiń aıtýynsha, bólshek salyq boıynsha arnaýly rejimge 2023 jylǵy 1 qańtardan bastap paıdalaný múmkindigi berilmek. Sondaı-aq osy baǵyttaǵy salyq rejimi 4 paıyzǵa deıin tómendetiledi.

Senat tóraǵasy qabyldan­ǵan zań elimizdegi salyq zańna­ma­syn odan ári jetildirý úshin ázirlengenin atap ótti. Naq­ty aıtqanda, jańa normalar azamattardyń tólem qabi­letti­ligin jáne bankrottyǵyn qalpyna kel­tirý, ósimdikter dúnıesi obekti­lerin paıdalaný jáne halyqtyń kóshi-qony salasyndaǵy salyq erejelerin naqtylaıdy.

«Senat bul zań jobasyna birqatar túzetý engizdi. Olardyń bir toptamasy bólshek salyqtyń arnaýly rejimine qatysty. Bul salyq rejimi pandemııadan zardap shekken sektorlar­da jumys isteıtin kásipkerler­di qoldaý úshin Memleket basshysynyń tapsyrmasymen ýaqytsha engizilgen edi. Mundaı shara shaǵyn jáne orta bıznes sýbektilerine úlken demeý bolyp, óziniń tıimdiligin kórsetti. Sondyqtan bólshek salyqty qalpyna keltirip, onyń jumysyn merzimsiz etý úshin tıisti túzetýler engizdik. Osy zań salyqtyq mindettemeni oryn­daýǵa baılanysty qatynastardy jetildirýge jáne salyq salýdyń aıqyndylyǵyn qamtamasyz etýge oń áserin tıgizedi dep senemiz», dedi Máýlen Áshimbaev.

Sonymen qatar otyrys barysynda «2014 jylǵy 29 mamyr­daǵy Eýrazııalyq ekonomıkalyq odaq týraly shartqa ózgerister engizý týraly hattamany ratıfıkasııalaý týraly» zań jobasy qabyldandy. Onyń normalary Eýrazııalyq ekonomıkalyq odaq sheńberinde taýarlardy ákelý kezinde janama salyqtar alý tártibin retteıdi. Sondaı-aq qujat EAEO-ǵa múshe mem­leketterdiń kásipkerleri ara­syndaǵy ózara saýdanyń artýyna yqpal etýdi kózdeıdi.

«Hattama arqyly EAEO týraly shartqa Reseı Federa­sııasynyń jekelegen arnaıy ekonomıkalyq aımaqtarynda salyq salý bóliginde ózgerister engiziledi. Jalpy, EAEO týraly shartta onyń jumys isteýiniń jáne múshe memleketterdiń, onyń ishinde salyq salý máse­leleri boıynsha ózara is-qımylynyń negizgi qaǵıdattary beki­tilgen. Atap aıtqanda, janama salyq­tardy óndirip alý tár­tibi jáne olardy múshe mem­leket­terdiń ózara saýdasynda tóleý tetigi Sharttyń №18 qosym­shasynda kózdelgen.

Salyq salýdyń negizgi qaǵı­daty – eksporttaýshy úshin qosyl­ǵan qun salyǵynyń nól­dik mólsherlemesin qol­daný jáne mejeli eldegi ımport­taýshynyń qosylǵan qun salyǵyn tóleýge qajettilik. Múshe memleketterdiń arnaıy ekonomıkalyq aımaqtaryna taýarlardy ımporttaý kezinde erkin keden rásimi qoldanylady. Iаǵnı Odaqtyń Keden kodeksiniń 201-babynyń 1-tarmaǵyna sáıkes taýarlar arnaıy ekono­mıkalyq aımaqtarynda kedendik bajdardy, salyqtardy jáne basqa da ótemaqy bajdaryn tólemeı ornalastyrylady jáne paıdalanylady», dedi zań jobasy jóninde baıan­dama jasaǵan Premer-mınıstrdiń orynbasary – Qarjy mınıstri Erulan Jamaýbaev.

Alaıda Odaqtyń Keden kodeksi­niń 455-babynyń 6-tar­maǵyna sáıkes Reseı Fede­rasııasynyń 3 arnaıy ekono­mı­ka­lyq aımaǵynda Odaq el­deriniń aýmaǵynan ımporttala­tyn taýarlar boıynsha kedendik bajdar men salyqtar birden tólenedi. Al úshinshi elderden ımporttaǵan kezde kedendik bajdar men salyqtar tólenbeıdi. Osylaısha, osy aımaqtarda kásipkerler úshin Odaqtyń elderinen góri úshinshi elderden taýarlardy ımporttaý tıimdirek.

«О́z kezeginde, Hattama normalary atalǵan arnaıy ekonomıkalyq aımaqtarǵa Odaqtan jáne úshinshi elderden taýarlardy ımporttaý kezinde teń jaǵdaılar jasaýǵa múmkindik beredi. Atap aıtqanda, Hattama Odaq elderinen ımporttalǵan taýarlar boıynsha kórsetilgen aımaqtarda 180 kún ishinde keıin­ge qaldyra otyryp, qosyl­ǵan qun salyǵyn tóleýdi kózdeıdi», dedi E.Jamaýbaev.

Budan bólek, senatorlar «Eýrazııalyq ekonomıkalyq odaqta tasymaldaýdy qadaǵalaý úshin navıgasııalyq plombalardy qoldaný týraly kelisimdi ratıfıkasııalaý týraly» zań jobasyn maquldady. Bul qujat kóleńkeli trafıkti qysqartý­ǵa, kedendik baqylaý prosesin ońtaılandyrýǵa jáne kólik­tik-logıs­tıkalyq qyzmetter­di da­­mytýǵa oń yqpal etýge baǵyttalǵan.

«Osy kelisim taýarlardy navıga­sııalyq plombalardy qoldana otyryp, olardy Eýrazııalyq ekonomıkalyq odaqtyń aýmaǵy boıynsha ótkizý kezin­de qadaǵalaý múmkindigin kózdeıdi. Taýarlardyń sanattary men kólik erekshelikterine baılanysty ótpeli kezeńder qa­rastyrylǵan. Bul qadaǵa­laýdyń árbir kezeńiniń bastalýymen navıgasııalyq plomba­lardy qoldaný­dyń tıim­diligin jetil­dirýge múmkin­dik beredi. Bıznes úshin osy kelisim­niń artyq­shylyǵy – óz taýar­laryn Odaq keńistiginde qaýipsiz tranzıtteý, oǵan múshe memle­ketterdiń baqy­laýshy or­gan­dary tarapynan baqy­laý­dyń qosymsha sharala­ryn bol­dyr­maý múmkindigin jasaý. Kelisim memleket úshin ha­lyq­­aralyq tasymaldardyń ashyq­­tyǵyn, «jalǵan tranzıt» pen «jalǵan ımportty» bol­­dyr­­maýǵa jáne tıisinshe bıýdjet­ke aqsha túsimderiniń ulǵaıýyna múmkindik beredi», dedi E.Jamaýbaev.

Kelisim qadaǵalaý obekti­lerin, navıgasııalyq mórlerge qoıylatyn talaptardy, ulttyq opera­torlardyń qyzmetin aıqyn­daıdy. Odan bólek, Eýra­zııalyq ekonomıkalyq odaqqa múshe memleketterdiń qadaǵalaý organdarynyń ózara is-qımyl nysandaryn belgileıdi.