Múgedektigi bar azamattardyń jumys isteýine jáne shyǵarmashylyqpen aınalysýyna tıisti jaǵdaı jasaý qajet. Mundaı qadam múmkindigi shekteýli adamdardyń ortaǵa beıimdelip, ómirden óz ornyn tabýyna oń áserin tıgizedi. Búgin Senat otyrysynda Qazaqstan Respýblıkasynyń Áleýmettik kodeksi jobasyn qaraý barysynda Palata Tóraǵasy Máýlen Áshimbaev osy máselege nazar aýdardy, dep habarlaıdy Egemen.kz.
«Kodeks jobasynda járdemaqyny kóterý, basqa da ataýly áleýmettik kómekti arttyrý jóninde normalar bar. Osy rette múmkindigi shekteýli azamattarǵa taǵy eki baǵyt boıynsha qoldaý kórsetýdiń mańyzy zor dep esepteımiz. Birinshiden, eńbek etkisi keletin múgedektigi bar azamattardy jumysqa ornalastyrýǵa kómektesýimiz qajet. Bul olardyń óz-ózderin qamtamasyz etýge jáne ortaǵa beıimdelýine oń yqpalyn tıgizedi. Sondyqtan osy baǵyttaǵy zańnamalardy pysyqtap, Eńbek kodeksine, basqa da tıisti zańdarǵa qajetti ózgeristerdi engizý máselesin qarastyrýymyz kerek. Sebebi qazirgi tańda jumys berýshilerdiń kóbi múgedektigi bar azamattardy alýǵa onsha qushtar emes ekenin kórip júrmiz», dedi Senat Spıkeri.
Sonymen qatar Palata Tóraǵasy buǵan deıin Parlament depýtattarynyń bastamashy bolýymen Áleýmettik kásipkerlik týraly zań qabyldanǵanyn, onyń negizgi maqsattarynyń biri múgedektigi bar adamdardy jumysqa ornalastyrý ekenin, alaıda qazirgi tańda bul norma óz deńgeıinde jumys istemeı jatqanyn atap ótti. Sondyqtan ol bul baǵyttaǵy máselelerdi de Parlament pen Úkimet birlesip, aqyldasyp sheshý kerektigin tilge tıek etti.
Máýlen Áshimbaev búginde shyǵarmashylyqpen aınalysyp júrgen múmkindigi shekteýli azamattardyń az emes ekenin, olarǵa osy baǵytta júıeli qoldaý kórsetý kerektigin de sóz etti.
«Qazirgi tańda múgedektigi bar azamattar, ásirese, jastar shyǵarmashylyqpen aınalysyp, sol arqyly ómirden óz ornyn tabýǵa umtylady. Keıbir óner ujymdary olardy jumysqa alǵanymen, sheshýdi qajet etetin máseleler týyndap otyr. О́ıtkeni Eńbek kodeksinde bul baǵyttaǵy keıbir máseleler kórsetilmegen. Osyndaı túıtkilderdi ońtaıly sheship, múgedektigi bar adamdarǵa shyǵarmashylyqpen aınalysýǵa múmkindikter jasap berýimiz kerek», dedi Senat Tóraǵasy.
Aıta keteıik, búgin Senat otyrysynda depýtattar Qazaqstan Respýblıkasynyń Áleýmettik kodeksiniń jobasyn jáne oǵan ilespe «Qazaqstan Respýblıkasynyń keıbir zańnamalyq aktilerine áleýmettik qamsyzdandyrý máseleleri boıynsha ózgerister men tolyqtyrýlar engizý týraly», «Qazaqstan Respýblıkasynyń keıbir konstıtýsııalyq zańdaryna ózgerister engizý týraly», «Ákimshilik quqyq buzýshylyq týraly Qazaqstan Respýblıkasynyń Kodeksine ózgerister engizý týraly» úsh zań jobasyn birinshi oqylymda qarady.