Qasym-Jomart Toqaev Túrki memleketteri uıymynyń «Apat jáne tótenshe jaǵdaılar menedjmenti, gýmanıtarlyq kómek» atty kezekten tys sammıtinde sóılegen sózinde birneshe mańyzdy máseleni atap ótti, dep habarlaıdy Egemen.kz.
Prezıdent qıyn kezderde birigip jumys isteýdiń mańyzdy ekenine toqtalyp ótti.
«Birinshi. Biz tabıǵı apattyń aldyn-alý úshin kúsh jumyldyrýymyz kerek. Túrkııadaǵy zilzala qaýip-qaterge qashanda daıyn bolý qajettigin kórsetti. Sondyqtan uıym aıasynda Tótenshe jaǵdaılar mekemeleriniń birlesken kúshin jasaqtaýdy usynamyn. Ony Almatydaǵy Tótenshe jaǵdaılar jáne alapat jer silkinisteriniń qaýip-qaterin azaıtý jónindegi ortalyqtyń negizinde ashýǵa bolady. Bul ortalyqty 2016 jyly Qazaqstan jáne Qyrǵyzstan úkimetteri qurǵan. Birlesken kúshke Uıymnyń Azamattyq qorǵanys hatshylyǵy mártebesin bergen jón dep sanaımyn. Ol apattan zardap shekken elderge kómek kórsetý jumystaryn úılestiretin bolady. Osy qurylym aıasynda halyqaralyq is-sharalar uıymdastyrylady», dedi ol.
Qasym-Jomart Kemeluly Túrkııaǵa kómek kórsetýdi jalǵastyratynyn aıtyp, qutqarýshylardyń kúshi men tehnıkalyq jabdyqtardy ázirleýdi tapsyratynyn málimdedi.
«Ekinshi. Túrkııada bolǵan jer silkinisi tabıǵı apattyń aldyn alý jáne onyń saldaryn joıý úshin ózara is-qımyldy úılestirý qajettigin kórsetti. Bul týraly «Túrki áleminiń keleshegi – 2040» qujatynda naqty aıtylǵan. Sondyqtan izdestirý jáne qutqarý qyzmetteriniń daıyndyǵyn kúsheıtýimiz qajet. Osy maqsatta elderimizdegi Tótenshe jaǵdaı mekemeleriniń kúshteri men tehnıkalyq qural-jabdyqtarynyń tizimin ázirleýdi usynamyn. Bul shara qıyn-qystaý sátte shuǵyl áreket etip, apattyń saldaryn joıý úshin is-qımyldy úılestirýge múmkindik bermek», dedi Prezıdent
Memleket basshysy bul jaǵdaıdan sabaq alyp, apattyń aldyn alý sharalaryn uıymdastyrýǵa múddeli ekenin aıtyp, uıymǵa múshe elderdi atalǵan is-sharaǵa qatysýǵa shaqyrdy.
«Úshinshi. Tótenshe jaǵdaıdyń aldyn alý úshin aqparat bólisip, qutqarýshylardyń tájirıbe almasýy óte mańyzdy. Bıyl kúzde Qazaqstanda «Qazqutqarý» halyqaralyq oqý-jattyǵý jıyndary ótedi. Uıymǵa múshe elderdiń qutqarý qyzmetterin atalǵan is-sharaǵa qatysýǵa shaqyramyn. Sol kezde osy salaǵa jaýapty mekeme basshylarynyń alǵashqy basqosýyn ótkizýge bolady», dep qorytyndylady Prezıdent.