OSK: Daýys berýdiń aldyn ala nátıjesi qandaı?

Ortalyq saılaý komıssııa­sy naý­qan bastalǵannan beri ár eki saǵat sa­ıyn óńirlerdegi nátı­jelerdi jarııa­lap otyrdy. Máselen, saǵat 10:00-ge deıin elimizdegi saı­laýshylardyń 14,2 paıyzy óz tańdaýyn jasap úlgergen. Saǵat 14:10-daǵy aqparat boıynsha, saı­laý­shylardyń 50 paıyzǵa jýyǵy óz tańdaýyn jasaǵanyn atap ótken jón. Osy ýaqytta ásirese Qostanaı óńirindegi halyqtyń belsendiligi joǵary boldy. Ortalyq saılaý komıssııasynyń dereginshe, bul óńir 62,36 paıyzben kósh bastap turdy. О́ńirler boıynsha Qyzylorda, Túrkistan, Jambyl, Qostanaı, Soltústik Qazaqstan oblystarynda halyqtyń belsendiligi baıqaldy.

Jalpy, saılaýshylardyń bel­sen­­diligi Astanada da erekshe baı­qal­dy. Mysaly, bas qalada­ǵy №139 saılaý ýchaskesine aǵylǵan­dardyń qarasy qalyń boldy. Eńkeıgen káriden, kámelettik jasqa tolǵan azamat­tarǵa deıin daýys berýge asyqty. Sonyń ishinde eń birinshi bolyp óz tańdaýyn jasap, syılyq alǵan saılaýshy – Qanysh Ámireev.

– Elimizdiń bolashaǵy jáne urpa­ǵymyzdyń keleshegi úshin  Erke­ǵalı Rahmadıev atyndaǵy Memlekettik akademııalyq fılar­monııasyndaǵy saılaý ýchaskesine kelip daýysymdy berdim. Alǵash ret osyndaı ma­jorıtarlyq saılaý bolyp jatyr. Kóp partııa óz kandıdattaryn usyndy. Sonyń ishinde elge belgili, isker azamattar bar. Sondyqtan erte kelip, olardy qoldaǵym keldi. Jalpy, saılaýǵa árbir azamat mindetti túrde qatysýy paryz dep bilemin. Aldaǵy ýaqytta saılanatyn depýtattar jurtyna adal bolyp, Otanyna aıanbaı qyzmet etedi dep úmit artamyz, – dedi ol.

Dál osy Astana qalasyndaǵy №139 saılaý ýchaskesine 3 myńǵa jýyq saılaýshy tirkelgen. Tek bir adam ǵana úıden daýys berýge sheshim qabyldaǵan. Mundaǵy saılaýshy­lardyń eń úlkeni – 86 jasta bolsa, alǵash ret saıası naýqanǵa qatysatyn 18 jastaǵy segiz saılaýshy bar.

Astanada «nındzıa tasbaqalar» daýys bergenin aıtýymyz kerek. Leonar­do, Rafael, Donatello jáne Mıkelandjelo keıpindegi daýys berýshiler №10 saılaý ýchaskesinde óz tańdaýyn jasady. Tipti elordalyq saılaýǵa «Dıvan batyr» da daýys berdi. Onyń obrazynan úı kıimin, qýattaǵysh symy bar telefonyn jáne ózinen bir eli ajyramaıtyn qyzǵylt dıvan kórindi.

Daýys berýge erekshe obrazda kelip, jurtty tańdandyrǵan qyzyq oqıǵa Qonaev qalasynda da boldy. Almaty oblysynyń turǵyny Nurbek Ormanov qaladaǵy saılaý ýchaskesine barystyń kostıýmin kıip kelgen.

– Egemendi el erteńi jastardyń qolynda, biz jastar ushqyr oıly, jasyn­daı jarqyldap tııanaqty eńbek etsek, Otanymyzdyń bola­shaǵy bıik­te bolmaq. Men barys kıimin kıgen sebebim búgingi saı­laýǵa ózgeshe ajar bergim keldi jáne Qonaev qalasyna qoıylǵan oblystyń sımvoly arqyly sýret­teýdi qaladym, – dedi ol.

Osylaısha, qyzyqqa toly bolǵan saılaýdyń aldyn ala qorytyndysy da belgili boldy. Ortalyq saılaý komıssııasy tóraǵasynyń orynbasary Konstantın Petrovtyń málimetinshe, tizimge engizilgen 12 032 578 azamattyń 6 521 860-y bıýlleten alǵan. Bul – saılaýshylardyń 54,19 paıyzy.

Al daýys berý nátıjeleri tómen­degideı: Abaı oblysy boıynsha – 57,2; Aqmola oblysy boıynsha – 60,1; Aqtóbe oblysy boıynsha – 58; Almaty oblysy boıynsha – 60,3; Atyraý oblysy boıynsha – 51,23; Batys Qazaqstan oblysy boıynsha – 59,20; Jambyl oblysy boıynsha – 65,21; Jetisý oblysy boıynsha – 55,32; Qaraǵandy oblysy boıynsha – 59,48; Qostanaı oblysy boıynsha – 65,10; Qyzylorda oblysy boıynsha – 67,21; Mańǵystaý oblysy boıynsha – 54,10; Pavlodar oblysy boıynsha – 58,68; Soltústik Qazaqstan oblysy boıynsha – 65,25; Túrkistan oblysy boıynsha – 53,1; Ulytaý oblysy bo­ıynsha – 58,99; Shyǵys Qazaqstan oblysy boıynsha – 64,15; Astana qalasy boıynsha – 42,91; Almaty qalasy boıynsha – 25,82; Shymkent qalasy boıynsha – 45,46 paıyz.

Ortalyq saılaý komıssııasy basshylyǵy saılaýdyń tolyq qory­tyndysy búgin jarııalanatynyn málim­dedi.