Memleket jáne qoǵam qaıratkeri Temirbek Júrgenovtyń 125 jyldyǵyna jáne halyqaralyq teatr kúnine oraılastyrylǵan «Sálem» halyqaralyq komedııalyq teatr festıvali shymyldyǵyn aıqara ashty. Festıvalge 9 atalym boıynsha Qazaqstan, О́zbekstan, Qyrǵyzstan teatrlary qatysýda.
Festıvaldiń resmı ashylýyna oraı baspasóz máslıhaty uıymdastyryldy. Onda atalmysh sharanyń maqsat-muraty tolaıym qamtyldy. Halyqaralyq teatr kúni merekesimen tuspa-tus kelgen óner sherýin osy salanyń naǵyz maıtalmandary nurlandyrmaq. Sóz arasynda qoǵam qaıratkeri Temirbek Júrgenov týraly da bir aýyz sóz aıta ketsek artyq bolmas. Máselen, Temirbek Júrgenovtyń bilim salasyna qosqan qısapsyz eńbegin bireý bilse, bireý bilmeıdi. Almatynyń ózinde ǵana 18 bilim oshaǵyn ashqan. Naǵyz halyq janashyry. Elimizdegi tuńǵysh joǵary oqý oryndarynyń kópshiligi el qamyn jegen Temirbek Júrgenovtyń arqasynda uıymdastyrylǵan. О́zgesin bylaı qoıǵanda, S.Asfendııarov atyndaǵy Qazaq ulttyq medısına ýnıversıtetiniń, Ál-Farabı atyndaǵy Qazaq ulttyq ýnıversıtetiniń, Almatydaǵy opera jáne balet teatrynyń negizin qalaýshylardyń biri. Bul jaıynda belgili teatrtanýshy Merýert Jaqsylyqova keńinen tolǵap aıtyp berdi.
Teatr festıvaliniń shymyldyǵy Astana qalasynyń jastar teatry sahnalaǵan «Prank-Mahabbat» komedııasymen ashyldy. Teatr ónerin jaqsy kóretin kókshetaýlyq kórermen tamasha qoıylymdardy kórip, tánti bolýda.
Kókshetaý qalasy