Batys Qazaqstan oblysynyń qylmystyq ister jónindegi mamandandyrylǵan aýdanaralyq sotynyń sheshimimen oblystyń 29 jastaǵy turǵyny asa iri mólsherde esirtki satqany úshin 11 jylǵa bas bostandyǵynan aıyryldy, dep habarlaıdy Egemen.kz Polisia.kz saıtyna silteme jasap.
Polıseıler anyqtaǵandaı, 2022 jyldyń jazynda kúdikti Telegram messendjerindegi arnaǵa tirkelip, esirtki satýdy josparlaǵan. Bul áreketin júzege asyrý úshin ol áleýmetik jeli paıdalanýshysymen baılanysyp, Oral qalasynda esirtkini zańsyz ótkizý týraly kelisim jasasqan.
Qylmystyq nıetin oryndaý maqsatynda kúdikti kýratordan qosymsha arqyly 100 myń teńge alyp, páter jaldap, esirtkini býyp-túıýge jáne salmaǵyn ólsheýge arnalǵan elektrondy tarazy, zıp-paketter, túrli tústi ızolenta men skotch satyp alǵan.
Ári qaraı esirtki jasyrý oryndarynyń koordınattaryn alyp, tyıym salynǵan zattardy jasyryp ketken. Sodan keıin ol jalǵa alǵan páterine oralǵan. Jedel is-sharalar barysynda oblystyń esirtki qylmysyna qarsy is-qımyl jónindegi qyzmetkerleri kúdiktini páterge jaqyn jerde ustady.
Ol ózimen birge bolǵan esirtki salynǵan paketti laqtyryp, jasyrynbaq bolǵan. Saraptama qorytyndysyna sáıkes alynǵan zattar sıntetıkalyq esirtki «mefedron» bolyp shyqty. Tyıym salynǵan zattyń salmaǵy shamamen bir kelini qurady.
Sot esirtki satýshyny kináli dep tanyp, 11 jylǵa bas bostandyǵynan aıyrdy. Aıta keteıik, bıylǵy jyldyń eki aıynda polıseıler elimizde ınternet arqyly esirtki taratýmen aınalysqan 77 adamdy ustady.