Ulystyń uly kúni qarsańynda kelgen avtobýstardy óńirdegi aýdandyq bilim bólimderiniń basshylary qabyldap aldy. Mańdaıynda «Balalar!» degen jazýy bar sý jańa sary avtobýstar shalǵaı aýyldarda turatyn oqýshylardy mektepke tasıtyn bolady.
Jańa avtobýstardyń bári jyldamdyq shektegishpen, qaýipsizdik beldikterimen jáne kondısıonermen jabdyqtalǵan. Tipti erekshe balalarǵa arnalǵan pandýstar men júrgizýshini shaqyratyn túımelerine deıin bar.
Oblystyq bilim basqarmasynyń málimetinshe, óńir mektepterine kún saıyn 2,5 myńnan astam oqýshy arnaıy bólingen avtobýstarmen qatynaıdy. Bilim mekemeleriniń avtoparki de jyl saıyn jańartylyp, tolyqtyrylyp otyrady. Máselen, sońǵy eki jyl ishinde oblystyq bıýdjet esebinen 322 mln teńgeden astam qarjyǵa 9 avtobýs jáne 12 shaǵyn avtobýs satyp alynǵan.
Avtobýstardy tapsyrý rásiminde Memleket basshysynyń qala men aýyl arasyndaǵy alshaqtyqty qysqartý jónindegi tapsyrmasynyń oryndalý barysy da sóz boldy. Bilim basqarmasy ókilderiniń aıtýynsha, 2025 jylǵa deıin óńirde 407 aýyldyq mektepti jańǵyrtý josparlanǵan. Onyń 81-i bıyl júzege asyrylady. Sondaı-aq sońǵy eki jyl ishinde 12,9 mlrd teńgege 193 bilim nysany jóndeýden ótken. Bıyl 138 mektepke jóndeý júrgizilmek. Oǵan 3 mlrd teńge qarastyrylyp otyr. «Jaıly mektep» ulttyq jobasy aıasynda da bitetin sharýa kóp. Máselen, 2025 jylǵa deıin qalalyq jáne aýyldyq mekenderde 7500 oryndyq 9 mektep salynbaq.
Qostanaı oblysy