Memleket basshysy aldaǵy 5 jyldyń el úshin eń mańyzdy kezeń ekenin aıtty, dep habarlaıdy Egemen.kz.
Qasym-Jomart Kemeluly naqty basymdyqtarǵa mán berýdi tapsyrdy.
«Naqty basymdyqtar formatynda jumys isteý kerek. Asa mańyzdy máselelerdi dereý sheshý qajet. Biraq keıbir máseleni keıinge qaldyrýǵa, al birqatary boıynsha aldaǵy sheshimderdiń tek jobasyn belgileýge týra keledi. Áıtpese, eńbegimiz zaıa ketedi jáne qolda bar resýrstarymyzdy sarqyp alamyz», dedi Prezıdent.
Sonymen qatar Memleket basshysy aldaǵy 5 jyldyń mańyzdy kezeń bolatynyn atap ótti. Sondyqtan da birshama ózgerister qajet ekenin aıtty.
«Aldaǵy bes jyl el taǵdyry sheshiletin mańyzdy kezeń bolmaq. Elimizdi qarqyndy damytý úshin sapaly zańnamalyq baza qalyptastyrý kerek. Ol úshin ekonomıkaǵa qajetti erejeler men qaǵıdalardy ózgertý qajet», dedi ol.
Mańyzdy ózgerister úshin qazirdiń ózinde qadam jasalǵanyn aıtyp, bet alǵan baǵyttan jańylmaý keregin atap ótti.
«Bul baǵytta alǵashqy qadamdar jasaldy. Monopolııadan aryltý jáne elimizden zańsyz shyǵarylǵan kapıtaldy qaıtarý jumystary júrgizilip jatyr. Bul elimizge ornyqty, básekege qabiletti iri bıznes kerek emes degendi bildirmeıdi. Kerisinshe, qajet ekeni sózsiz jáne biz ony qoldaımyz. Iri bıznes bizdiń jańa ekonomıkalyq paradıgmada jańasha jumys isteı bastaıdy ári mindetti túrde damıdy. Jalpy ashyq ári ózin-ózi qamtamasyz etetin naryqtyq ekonomıka qalyptastyrý basty basymdyq bolyp qala beredi», dedi Memleket basshysy.