Búgin L.N.Gýmılev atyndaǵy Eýrazııa ulttyq ýnıversıteti men «QazBioPharm» ulttyq holdıngi» AQ yntymaqtastyq týraly kelisimge qol qoıdy. Qujat kadrlardy daıarlaý úshin birlesken bilim berý jobalaryn iske asyrýdy jáne bıologııa, bıotehnologııa, vırýsologııa, ekologııa, genetıka jáne basqa da salalarda ǵylymı zertteýler júrgizýdi kózdeıdi, dep habarlaıdy Egemen.kz.
Kelisimge EUÝ rektory Erlan Sydyqov jáne «QazBioPharm «Ulttyq holdıngi» AQ bas dırektory Kúnsulý Zakarııa qol qoıdy. Taraptar bilim berý, ǵylymı-tehnıkalyq jáne ınnovasııalyq qyzmet salasyndaǵy yntymaqtastyqty damytýǵa nıetti.
«Taıaýda Memleket basshysy Parlamenttiń birinshi sessııasynyń ashylýynda otandyq ekonomıkanyń damýy ǵylymnyń jetistikterine negizdelýi tıis ekenin atap ótti. Bul rette tek patentter alý, maqalalar jazý jetkiliksiz. Ǵylymı ázirlemeler óndiriske keńinen engizilip, ekonomıkanyń ósimine yqpal etýi kerek. Bul turǵyda zertteý ýnıversıtetterine erekshe mıssııa júkteledi. EUÝ da zertteý ýnıversıtetine transformasııalanýda.
Koronavırýsqa qarsy otandyq vaksınany tabysty ázirlegen jáne shyǵarǵan QazBioPharm holdıngimen búgingi kelisim kadrlardy daıarlaý sapasyn arttyrýǵa, birlesken ǵylymı zertteýler júrgizýge, ýnıversıtet pen holdıng ǵalymdarynyń ǵylymı jáne ǵylymı-tehnıkalyq qyzmetiniń nátıjelerin kommersııalandyrýǵa úlken jol ashady», dedi Erlan Sydyqov.
Bıylǵy jyldan bastap otandyq farmasevtıka ónerkásibi úshin qajetti mamandardy oqytýdyń birlesken baǵdarlamalary ázirlenedi. Ǵylymı kadrlardy daıarlaý maqsatynda EUÝ men QazBioPharm birlesken dıssertasııalyq keńes qurýdy josparlap otyr. Holdıng EUÝ bilim alýshylarynyń óndiristik jáne ǵylymı taǵylymdamadan ótý bazasyna aınalady.
«Biz kadrlardy birlesip daıarlaýdy júzege asyramyz. Sebebi «QazBioPharm» holdıngine bıologııalyq qaýipsizdik, bıotehnologııa, farmasııa, genetıka salasyndaǵy joǵary bilikti mamandar qajet. Qazirgi ýaqytta álemniń 300 úzdik ýnıversıtetteriniń qataryna kiretin jáne aıtarlyqtaı ǵylymı áleýetke ıe Eýrazııa ulttyq ýnıversıtetimen kelisim ortaq maqsattardy iske asyrýǵa, sonyń ishinde bıologııalyq qaýipsizdikti qamtamasyz etý jáne otandyq farmasııany damytý úshin berik ǵylymı-bilim berý platformasyn qalyptastyrady», dep atap ótti Kúnsulý Zakarııa.
EUÝ men QazBioPharm jańa preparattar men tehnologııalardy ázirleýge jáne shyǵarýǵa kirisedi. Qos mekemeniń ǵalymdary bıologııa, bıotehnologııa, vırýsologııa, ekologııa, genetıka salalarynda birlesken ǵylymı-zertteý jumystaryn júrgizedi. Sondaı-aq ýnıversıtet ǵalymdarynyń bıologııa, bıotehnologııa salasyndaǵy ǵylymı jobalary men jańa dárilik preparattar boıynsha ázirlemelerin kommersııalandyrý kózdelýde.