Tabıǵaty kórkem Alataýdyń taý-tasy men ózen-kólderi týrızmniń qaınar kózi sanalady. Otandyq týrızmdi damytý arqyly eldiń áleýmettik-ekonomıkalyq jaǵdaıyn arttyrýǵa baǵyttalǵan jobalar joq emes. Bıyl Almaty oblysynyń týrızm salasynda 12 ınvestısııalyq jobany júzege asyrý kózdelgen.
Bul týraly Qonaev qalasynda ótken «Alatau hike» halyqaralyq týrıstik forýmynda baıandaldy. Almaty oblysynyń týrıstik áleýetin halyqaralyq naryqta ilgeriletý, elder arasyndaǵy týrıstik almasýdy arttyrý, sheteldik áriptestermen baılanysty keńeıtý jáne nyǵaıtýdy maqsat etken sharaǵa BAÁ, Italııa, Ulybrıtanııa, Nıderland, Reseı, Ázerbaıjan men Qatar elderinen kelgen sheteldik sarapshylar qatysty. Forým qonaqtaryna aqparattyq týr uıymdastyrylyp, olar óńirdiń maqtanyshyna aınalǵan «Sharyn», «Kólsaı kólderi» ulttyq saıabaqtary men Shonjynyń ystyq sýlarynyń ǵajaıyptaryn kórip, ásem tabıǵatyn tamashalady. Sonymen qatar Qonaev qalasynyń týrıstik áleýetimen tanysty.
Budan keıin Qonaev qalalyq Mádenıet úıinde oblystyń týrıstik áleýetin pash etetin jáne osy salada júzege asyp jatqan ıgi bastamalar jaıyndaǵy promo-beıne úzikten bastalǵan alqaly jıyn ótti.
– Almaty oblysy – elimizdegi týrıstik salanyń kóshbasshysy. Qazaqstannyń úzdik bestigine kiredi. Búgingi tańda sheteldik týrıster úshin eń qolaıly ári daıyn baǵyt bolyp esepteledi. Oblystyń týrıstik áleýeti óziniń alýan túrli tabıǵatymen, qumdy shólderden bastap qarly shyńdarǵa deıin jalǵasady. Onyń ishinde ulttyq parkter men tarıhı jerler bar, dedi halyqaralyq forýmda sóz alǵan Almaty oblystyq týrızm basqarmasynyń basshysy Aıbar Temenov.
Basqosýda týrızm sabaqtastyǵy men jańashyldyǵy, týrıstik mádenıetti qalyptastyrý, óńirde týrızm salasyn damytý, ınvestısııanyń tıimdiligi, kadr máselesi tóńireginde aýqymdy máseleler talqylandy. Negizgi taqyryptardyń biri – oblys ortalyǵy Qonaev qalasyndaǵy elimizdiń eń iri sý qoımalarynyń qataryndaǵy Qapshaǵaıdyń týrıstik áleýetin kóterý týraly oı ortaǵa salyndy. Sondaı-aq ótken jyly Qapshaǵaıǵa 1 mln-nan asa demalýshy kelgeni jáne týrızmdi damytýdyń keshendi baǵdarlamasy boıynsha jaǵalaý keńeıtiletini tilge tıek boldy.
– Álemniń biraz elin araladym. Kóp jerdegi negizgi másele – tarıhı oryndarǵa, týrıstik nysandarǵa jetý máselesi. Iаǵnı joldardy jóndeý kerek degen sóz. Odan keıin týrızm salasynda jumys isteıtin mamandar mindetti túrde halyqaralyq tilderdi meńgergeni jón, degen Anglııanyń «Avrupa Media Group» jobasynyń basshysy Vatan Oz Sharyn shatqaly men Kólsaı kólin halyqaralyq týrızm úshin óte mańyzdy nysan sanaıtynyn aıtty.
Almaty oblysy