Elimizdegi 8 joǵary oqý orny «QS World University Rankings by Subject» álemniń úzdik ýnıversıtetteriniń pándik reıtıngine endi.
Otandyq joǵary oqý oryndarynyń júzdikter kerýenine qatysýy bıyl joǵary kórsetkishtermen erekshelendi. Halyqaralyq bilim berý keńistiginde óz yqpalyn arttyrý maqsatynda bilim berý baǵdarlamalarynyń sany toǵyzǵa, al reıtıngtegi joǵary oqý oryndarynyń sany segizge jetti.
L.N.Gýmılev atyndaǵy Eýrazııa ulttyq ýnıversıteti, Satbayev University, Ál-Farabı atyndaǵy Qazaq ulttyq ýnıversıteti, Abaı atyndaǵy Qazaq ulttyq pedagogıkalyq ýnıversıteti, Abylaıhan atyndaǵy Qazaq halyqaralyq qatynastar jáne álem tilderi ýnıversıteti, Suleyman Demirel University, Qoja Ahmet Iаsaýı atyndaǵy Halyqaralyq qazaq-túrik ýnıversıteti, Qazaq ulttyq agrarlyq zertteý ýnıversıteti bes pándi qamtıtyn salalyq reıtıngterge qatysty. Osy oraıda óner jáne gýmanıtarlyq ǵylymdar, ınjenerlik ǵylymdar men tehnologııalar, ómir týraly ǵylymdar jáne medısına, jaratylystaný ǵylymdary, qoǵamdyq ǵylymdar jáne menedjmentte reıtıngtik kórsetkishke qol jetkizdi.
«QS» aımaqtyq dırektory Sergeı Hrıstolıýbov: «Álemniń úzdik ýnıversıtetteriniń pándik reıtıngterindegi otandyq joǵary oqý oryndarynyń sany segizge jetti. Bul úsh jyl burynǵy kórsetkishten tórt ese kóp. Jańa pándik nátıjeler Qazaqstannyń qazirgi ǵylymı kún tártibindegi joǵary oqý oryndarynyń reıtıngterin ilgeriletý múmkindigin kórsetedi», dedi.
Ál-Farabı atyndaǵy Qazaq ulttyq ýnıversıteti otandyq jáne Ortalyq Azııanyń joǵary oqý oryndary arasynda daıyndyq boıynsha 14 baǵytta jáne bes pándik salanyń tórteýi boıynsha naqty nátıjelerge qol jetkizip otyr. Bıyl ýnıversıtet «geografııa» baǵyty boıynsha alǵash ret 151-200 pozısııany ıelenip, álemdegi eń úzdik 200 ýnıversıtettiń, sondaı-aq «fılosofııa» baǵyty boıynsha úzdik 150 ýnıversıtettiń qataryna enip otyr. Ulttyq ýnıversıtettiń 542 bilim berý baǵdarlamasynyń 25 paıyzy «QS by Subject» reıtıngine enip, salystyrmaly kezeńde 4 paıyzǵa artty. «Arheologııa», «Aǵylshyn tili men ádebıeti» – 151-200, «Matematıka» – 251-300, «Fızıka jáne astronomııa» – 451-500, «Hımııa» – 501-550 baǵytynda ótken jylǵy ornyn saqtap qaldy. Ýnıversıtet ǵalymdary jarııalanymdyq belsendiligin saqtaı otyryp, 500-den astam jetekshi sheteldik joǵary oqý ornymen yntymaqtastyǵyn jalǵastyrýmen qatar zertteý ýnıversıteti mártebesin nyǵaıta túsýdi kózdeıdi.
Atalǵan reıtıngte Qazaq ulttyq agrarlyq zertteý ýnıversıteti «Aýyl sharýashylyǵy jáne Orman resýrstary» (Agriculture and Forestry) baǵyty boıynsha 401-den – 301-350-ge deıingi tuǵyrǵa kóterildi. Ýnıversıtettiń «QS by Subject» reıtıngindegi kórsetkishi atalǵan oqý ornynyń otandyq jáne álemdik ozyq ǵylymı uıymdarymen jáne áleýetti jumys berýshilermen yntymaqtastyǵynyń joǵary ekenin kórsetedi.
«QS by Subject» reıtıngi ýnıversıtetterdiń akademııalyq bedelin baǵalaıtyn bes ındıkatorda túlekter týraly jumys berýshilerdiń pikirleri, professor-oqytýshylar quramynyń ǵylymı maqalalaryna silteme jasaý, Hırsh ındeksi jáne ýnıversıtettiń álemge áıgili uıymdarmen halyqaralyq zertteý baılanystary negizge alynady. Osy nátıjelerge qarap, elimizdiń zertteý ýnıversıteti mártebesi bar joǵary oqý oryndarynyń kórsetkishteri aldaǵy ýaqytta da reıtıng sapasyna áser etetinin kórsetedi.